पोस्ट ऑफिस मार्गावर झाडाची फांदी कोसळून नुकसान

बेळगाव : कॅम्प येथील मुख्य पोस्ट कार्यालय रस्त्यावर एका जुनाट वृक्षाची फांदी कोसळल्याची घटना मंगळवारी घडली. फांदी वीजवाहिन्यांवर कोसळल्याने विद्युतखांबाचे नुकसान झाले. त्यामुळे या परिसरातील वीजपुरवठा खंडित करण्यात आला होता. शहरात झाडे कोसळण्याचे प्रमाण दिवसेंदिवस वाढत आहे. मागील आठ दिवसांत विश्रांती घेतलेल्या पावसाने पुन्हा सुरुवात केली आहे. सोमवारी व मंगळवारी झालेल्या पावसामुळे काही ठिकाणी वृक्ष व त्यांच्या फांद्या कोसळल्या. मुख्य पोस्ट कार्यालयाजवळ पोस्ट अधीक्षकांच्या बंगल्याशेजारील झाडाची फांदी कोसळून नुकसान झाले. झाडाची मोठी फांदी वीजवाहिन्यांसह विद्युतखांबावर कोसळली. यामध्ये वीजखांबाचे नुकसान झाल्याने मंगळवारी दिवसभर दुरुस्तीचे काम सुरू होते. कंपाउंडच्या शेजारीच पेट्रोलपंप असल्यामुळे त्याठिकाणी नागरिकांची ये-जा सुरू असते. फांदी कोसळली त्यावेळी सुदैवाने कोणी नसल्याने जीवितहानी टळली.