सांगली :
सांगलीतील सिटी सर्व्हे नंबर एक मधील ६४ मिळकतींचा सत्ता प्रकार बदलल्याने गेली पाच वर्षे आ. सुधीर गाडगीळ यांनी केलेल्या विशेष प्रयत्नांना यश आले. याबद्दल त्यांनी विद्यमान महसूल मंत्री चंद्रशेखर बावनकुळे आणि पूर्वीचे मंत्री बाळासाहेब विखे पाटील यांची भेट घेऊन आभार मानले.
सांगली शहरातील जमिनीसंदर्भात मंत्रीमंडळ बैठकीत महत्वपूर्ण निर्णय घेण्यात आला. या निर्णयानुसार सांगली संस्थानच्या सिटी सर्व्हे नं. १ मधील एकूण ६४ मिळकतींचे सत्ताप्रकार ‘एल’ वरून ‘ए’ मध्ये विनामूल्य रुपांतरण करण्यात येणार आहेत.
आ. सुधीर गाडगीळ यांनी सातत्याने यासंदर्भात बैठका घेण्यासाठी आग्रह धरला होता. तो निर्णय झाल्याने आमदार सुधीर गाडगीळ यांचे संबंधितांकडून अभिनंदन होत आहे.
सांगली शहरातील या मिळकती सन १९२८ मध्ये तयार झाल्या होत्या. त्या शासन अभिलेखांमध्ये ‘एल’ सत्ताप्रकार अर्थात शासकीय जागा, इमारती म्हणून नोंदविल्या गेल्या होत्या. त्यामुळे या मिळकती नियंत्रित सत्ताप्रकारात गणल्या जात होत्या.
या मिळकतींची खरेदी-विक्री, वापरात बदल यांसारख्या व्यवहारांवर निर्बंध लागू होत होते. मात्र, या मिळकती संबंधित धारकांनी रितसर खरेदीखतांद्वारे विकत घेतलेल्या असल्यामुळे त्यांना नियामक सत्ताप्रकारातून मुक्त करणे आवश्यक होते.
या निर्णयामुळे सांगली शहरातील शेकडो नागरिकांना दिलासा मिळणार आहे. त्यांच्या मालकीच्या जमिनीवरील व्यवहारांना कायदेशीर स्थैर्य मिळेल.
या निर्णयामुळे सांगली परिसरातील स्थावर मालमत्तेच्या व्यवहारांना चालना मिळणार आहे. नागरी विकासाच्या दृष्टीनेही तो एक महत्त्वपूर्ण टप्पा ठरणार आहे. आमदार सुधीर गाडगीळ यांनी महसूलमंत्री चंद्रशेखर बावनकुळे यांची विधानभवन येथे भेट घेतली. पुष्पगुच्छ देऊन त्यांचे अभिनंदन करत आभारही मानले.
- शासकीय जमिनी ‘ए’ सत्ता प्रकारात
सांगली शहरातील शेकडो नागरिकांच्या मालमत्ता बद्दल शासनाने हा महत्त्वपूर्ण निर्णय घेतला. आता ‘एल’ सत्ता प्रकारातील शासकीय जमिनी ‘ए’ सत्ता प्रकारात येणार आहेत. त्याचबरोबर खरेदीखत धारकांना नोंदणी व्यवहाराला मोकळीक मिळणार आहे.
