रेल्वेमध्ये दोन प्रवाशांना बेशुद्ध करणारा अटकेत

रत्नागिरी :

मुंबईच्या दिशेने जाणाऱ्या कोकणकन्या एक्स्प्रेसमध्ये दोन प्रवाशांना गुंगीचे औषध देऊन लुटणाऱ्या एका संशयित आरोपीला रेल्वे सुरक्षा दलाच्या (आरपीएफ) गुन्हे आणि गुप्तचर शाखेच्या पोलिसांनी सतर्कतेने पकडले. ही घटना मंगळवारी रात्रीच्या 12 वाजण्याच्या सुमारास रत्नागिरी स्थानकानजीक घडली. संशयित वसीम उद्दीन (25) याच्याकडून चोरी केलेला सुमारे 21 हजार 710 रुपयांचा ऐवज जप्त करण्यात आला आहे. मंगळवारी रात्री 12 वाजण्याच्या सुमारास ही कारवाई करण्यात आली.

बेशुद्ध प्रवाशांची नावे गोकुळ हिराजी तोता (रा. अमरावती) आणि अशोक कुमार राजभर (रा. पश्चिम बंगाल) अशी आहेत. या प्रवाशांना पनवेल ग्रामीण ऊग्णालयात दाखल करण्यात आले आहे. आरपीएफ रत्नागिरीचे निरीक्षक संजय वत्स, पीआर अमोल पाटील आणि पीआर कोकरे हे कोकणकन्या एक्स्प्रेसमध्ये गस्तीवर होते. मंगळवारी रात्री संगमेश्वर रेल्वे स्थानकावर ट्रेन थांबली असता, उद्दीन (25) हा जनरल डब्यातून संशयास्पदरित्या उतरून स्लीपर कोचमध्ये चढताना दिसला. आरपीएफ पथकाला त्याचा संशय आल्याने त्यांनी स्लीपर कोच ए 6 मध्ये त्याला थांबवले. त्याच्याकडे तीन मोबाईल फोन आढळले. चौकशी दरम्यान आरपीएफच्या जवानांना तो समाधानकारक उत्तर देऊ शकला नाही.

• मडगाव रेल्वेस्थानकात रेल्वेत चढला

आरपीएफच्या पथकाने या संशयिताला ताब्यात घेऊन चिपळूण स्थानकावर उतरवले. चिपळूण येथे आरपीएफने त्याची कसून चौकशी केली. त्यावेळी उद्दीन घनीने सांगितले, तो बिहारचा रहिवासी आहे. सध्या मुंबईतील अंधेरी येथील एका बांधकाम साईटवर काम करतो. दादरमध्ये भेटलेल्या ‘राजू‘ नावाच्या व्यक्तीने त्याला काही चॉकलेट देऊन मडगावला पाठवले होते. ‘राजू‘च्या सांगण्यावरून तो 8 जुलै रोजी मडगाव रेल्वेस्थानकावरून जनरल कोचमध्ये चढला होता.

• संगमेश्वरात पकडले

प्रवासादरम्यान घनीने आपल्या शेजारी बसलेल्या दोन अनोळखी प्रवाशांशी मैत्री केली. त्याने दोघांना Tिंन्न्Aऱ् नावाच्या गोळ्या मिसळलेली दोन चॉकलेट खायला दिली. रत्नागिरी स्थानकाजवळ दोन्ही प्रवासी बेशुद्ध पडल्यानंतर त्याने त्यांचे दोन मोबाईल आणि एका प्रवाशाची पर्स चोरली. जेव्हा गाडी संगमेश्वर स्थानकावर थांबली तेव्हा तो डबा बदलून स्लीपर कोचमध्ये जात असतानाच पोलिसांनी घनीला पकडले. आरपीएफ रत्नागिरीचे निरीक्षक संजय वत्स यांनी तत्काळ आरपीएफचे पनवेल येथील उपनिरीक्षक विद्यानंद तायडे यांना याबाबत माहिती दिली.

रत्नागिरी येथे आरपीएफतर्फे संशयित आरोपीची पुन्हा चौकशी करण्यात आली. त्याने प्रवाशांना विषारी औषध देऊन चोरी केल्याची कबुली दिली. त्याच्याकडील बॅगेतून दोन बेशुद्ध प्रवाशांकडून चोरलेले कपडे, दोन मोबाईल फोन (ओप्पो आणि व्हिवो), एका प्रवाशाच्या खिशातील पर्स ज्यात 710 ऊपये रोख, अशोक कुमार राजभर यांचे आधार कार्ड, निवडणूक आयोगाचे ओळखपत्र, पॅन कार्ड आणि तीन एटीएम कार्ड तसेच चॉकलेटच्या प्लास्टिक पिशवीत गुंगीचे औषध सापडले. हे सर्व साहित्य निरीक्षक संजय वत्स यांनी दोन पंचांच्या उपस्थितीत जप्त केले.

रत्नागिरी येथे आरपीएफ निरीक्षक सतीश विधाते आणि संजय वत्स यांनी शहर पोलिसांच्या सहाय्याने तपास आणि आवश्यक कारवाई केली. त्यानंतर संशयित आरोपी घनी आणि जप्त केलेला ऐवज शहर पोलिसांच्या स्वाधीन करण्यात आला.

• कोरे प्रशासनाकडून प्रवाशांना आवाहन

रेल्वेतून प्रवास करताना कोणत्याही अनोळखी व्यक्तीने दिलेला पदार्थ अथवा खाऊ नये किंवा पिऊ नये. प्रवासात सतर्क राहण्याचे आवाहन कोकण रेल्वेचे जनसंपर्क अधिकारी सचिन देसाई यांनी केले आहे.