खंडाळा :
बसस्थानकात एस. टी. बस सुरु करताच भरधाव वेगात थेट उपहारगृहाच्या बाजुला असणाऱ्या टाक्यांची भिंती पाडून झुडपात घुसली. यामध्ये चालकासह चार जण गंभीर जखमी झाले आहेत. सुदैवाने शाळांना स्थानिक सुट्टी असल्याने विद्यार्थ्यांची गर्दी बसस्थानकात नसल्याने एक अनर्थ टळला असल्याची चर्चा सुरु होती. बसस्थानकात घडलेल्या घटनेमुळे पारगाव – खंडाळा आगारात तांत्रिक बिघाड व नादुरुस्त एस. टी. बसेसचा प्रश्न पुन्हा ऐरणीवर आला आहे.
याबाबत माहिती अशी की, पारगाव-खंडाळा आगाराची स्वारगेट – महाबळेश्वर बस चालक दत्तात्रय राऊत हे स्वारगेटहून सकाळी घेवून निघाले होते. ते पारगाव -खंडाळा बसस्थानकात आले. मात्र, बसमध्ये तांत्रिक बिघाड झाल्याचे लक्षात येत बस थांबविली. बसमध्ये 27 प्रवासी होते. यातील 4 जण 10 मीटरच्या अंतरावर उतरल्याने अपघातावेळी 23 प्रवासी यात होते. बसस्थानकात वाहक, काही प्रवाशी उतरले. त्यानंतर ती बस अचानक पुढे सरकली. यावेळी दोन दुचाकी, भिंत व पाण्याच्या टाकीला धडकुन ही गाडी झाडाला अडकली. या अपघातात राहुल रामचंद्र कुंभार (भोगाव ता. वाई), कमल बाळु कुंभार (रा. शिरवळ) तर मेधा फडतरे (पुणे) व चालक दत्तात्रय राऊत हे गंभीर जखमी झाले. तसेच दोन दुचाकी, भिंत व टाक्याचे मोठे नुकसान झाले. अपघाताचे वृत्त समजताच आगार व्यवस्थापक बिसमिल्ला सय्यद, पवन वाघेला पोलिसांनी घटनास्थळी भेट दिली.
दरम्यान, बसस्थानकात आल्यावर बस थांबली तेव्हा काही प्रवासी व वाहक खाली उतरले. बस फलाटाला लावण्यासाठी पुन्हा बस सुरु करताना गाडी दचके मारत होती. बस सुरु होताच अचानक वेगात बस पुढे जात असताना चालकाने प्रसंगावधान राखीत उपहारगृह व स्वच्छतागृहाच्या मधील मोकळ्या जागेत बस घातली असल्याचे सांगण्यात येते. यावेळी ती पत्र्याचे कंपाऊंड तोडून पाण्याच्या टाक्या असलेले भिंतीला धडकून अडकली. चालकाने आजअखेर विनाअपघात सेवा बजावली आहे. मात्र आजचा अपघात तांत्रिक दोषामुळे की मानवी चुकीमुळे घडला हे तपासाअंती सिद्ध होणार आहे.
- महिला वाहकाकडून प्रसंगावधान !
बसस्थानकात बस येताना दिसताच वाई महाबळेश्वरला जाणारे प्रवासी पळत आले होते. मात्र, वाहक कल्पना भारमळ यांनी प्रसंगावधान राखत प्रवाशांना तत्काळ बाजुला केले. तर प्रवासी असणारी बस अचानक पुढे सरकली आणि अपघात घडला. बसस्थानकात नशीब बलवंतर म्हणून पुढील अनर्थ टळला. दरम्यान, अपघातग्रस्त बसमधील प्रवासी दुसऱ्या बसमधून पाठविण्यात आले.
