वार्ताहर/बाळेकुंद्री
कर्नाटक, महाराष्ट्र व गोवा राज्यातील लाखो भाविकांचे श्रध्दास्थान असलेल्या सौंदत्ती येथील यल्लमा देवीच्या मंदिराची दानपेटी गुरुवारी खोलण्यात आली. यंदा यल्लम्मा देवीच्या भक्तांनी एक महिन्यात एक कोटी 4 लाखाहून अधिक रकमेचे दान रेणुकादेवीच्या चरणी अर्पण केले आहे. गेल्या दोन दिवसापासून सुरू झालेली मोजणी गुरुवारी पूर्ण झाली. या दानपेट्यांतील दान रकमेची ईन पॅमेराव्दारे भाविकांच्या उपस्थितीत मोजणी करण्यात आली आहे. दानपेटीतील आजपर्यंतचा हा विक्रमी निधी आहे. यासाठी यल्लमा मंदिराचे शासनाधिकारी, जिल्हाधिकारी व संबंधित देवस्थान विकास प्राधिकरणाचे सचिव अशोक दुडगुंटी यांनी रितसर अनुमती घेऊन दानपेटी खोलण्यात आली. या दानपेटीतील रक्कम, मौल्यवान दागिने मोजण्यात आले. दानपेटीत 98 लाख 23 हजार रोख रक्कम, 5 लाख 53 हजार किमतीचे 54 ग्रॅम सोने, 1 लाख 27 हजार रुपये किमतीच्या चांदीची मोजणी केली. यावेळी मुजराई खात्याचे अधिकारी, देवस्थानचे उपकार्यदर्शी नागरत्ना चोळीन, डी. आर. चव्हाण, अन्नपूर्णा बाहयहट्टी, पॅनरा बँकेचे व्यवस्थापक व कर्मचारी उपस्थित होते.
