लांजा :
कोणाचेही नुकसान न करता नागरिकांच्या हरकती लक्षात घेऊन आणि सर्वांना विश्वासात घेऊनच विकास आराखड्यात अत्यावश्यक बदल केले जातील, असे आश्वासन आमदार किरण सामंत यांनी कुचे ग्रामस्थांना दिले. कुवे येचील डॅम्पिग ग्राऊंडची जागेवर जाऊन पाहणी करत मुख्याधिकाऱ्यांना १५ दिवसात जागा बदलण्याची सूचना आमदार सामंत यांनी केली.
कुवे ग्रामस्थांनी नुकतीच आमदार किरण सामंत यांची भेट घेतली. यावेळी सामंत यांनी आश्वासन दिले. शहर विकास आराखड्याबाबत समस्या, कुवेतील इंम्पिंग ग्राऊंड व नगर पंचायत कार्यक्षेत्रात मृत्यू दाखल्यासाठी वैद्यकीय अधिकाऱ्यांचे आवश्यक असणारी वैद्यकीय प्रमाणपत्र अट रद्द करण्यात यावी, अशा मागणीसंदर्भात सामंत यांची भेट घेत चर्चा केली. यावेळी कुवे ग्रामस्थांनी सामंत यांना विविध मागण्यांचे निवेदन देण्यात आले. या निवेदनात म्हटले आहे की, कुवेतील महामार्गावर असणारे डंम्पिग ग्राऊंड गेली २ वर्षे सुरू आहे. या डंम्पिग ग्राऊंडच्या आजूबाजूला लोकवस्ती व लोकांचा मोठ्या प्रमाणात वावर आहे. आम्ही वारंवार मागणी करूनही काही कार्यवाही होत नाही. त्यामुळे आपण लक्ष घालून डम्पिंग ग्राउंड त्वरित स्थलांतरित करावे.
- लांजा-कुवे असे नाव हवे
तसेच लांजा ग्रामपंचायत व कुवे ग्रामपंचायत मिळून लांजा नगर पंचायत स्थापन झाली. परंतु स्थापन होताना लांजा कुवे न होता फक्त लांजा नगर पंचायत असे नामकरण करण्यात आले. आपण आपल्या स्तरावर कार्यवाही करून लांजा कुवे असे नामकरण करण्यात यावे. तसेच लांजा कुवे नगर पंचायत कार्यक्षेत्रात मृत्यूदाखला नोंदणी करण्यासाठी सर्व मृत्यू नोंदीसाठी वैद्यकीय प्रमाणपत्र अत्यावश्यक केले आहे. अपघाती किंवा दवाखान्यात मृत्यू होणाऱ्या व्यक्तीला वैद्यकीय प्रमाणपत्र मिळणे शक्य होते. परंतु नैसर्गिक किंवा व वृद्धापकाळाने झालेल्या मृत्यूचे प्रमाणपत्र मिळविणे जिकरीचे होते. त्यामुळे नैसर्गिकरित्या झालेल्या मृत्यू दाखला नोंदणीसाठी संबंधित नगरसेवक किंवा पोलीस पाटील यांचा दाखला ग्राह्य धरण्यात यावा, अशा मागण्या निवेदनाद्वारे करण्यात आल्या आहेत. निवेदन देताना कुवेतील माजी नगरसेवक सचिन डोंगरकर यांसह इतर कुवे ग्रामस्थ उपस्थित होते.
लांजा शहर विकास आराखड्याला कुवेतील ग्रामस्थांनी कडाडून विरोध केला होता. हा विकास आराखडा तत्काळ रद्द करण्याची मागणी कुवे ग्रामस्थांनी मुख्याधिकारी नगर पंचायत लांजा यांच्याकडे निवेदनाद्वारे केली. तसेच लांजा नगर पंचायतीच्यावतीने शहर प्रारुप विकास आराखड्यासंदर्भात असणाऱ्या नागरिकांच्या शंका, अडीअडचणीचे निरसन करण्यासाठी नगर पंचायतीच्यावतीने २६ एप्रिल रोजी शहरातील आग्रे हॉल येथे बैठक पार पडली. बैठकीत कुचे ग्रामस्थांनी हा विकास आराखडा रद्द करण्यात यावा, अशी जोरदार मागणी केली. मात्र यावेळी किरण सामंत यांनी कोणत्याही परिस्थितीत विकास आराखडा हा रद्द होणार नाही, येणाऱ्या हरकतीवर मार्ग काढून न्याय देण्याचा प्रयत्न केला जाईल, असे सांगितले होते.
- कोणावरही अन्याय होणार नाही
या पार्श्वभूमीवर कुवे ग्रामस्थांनी आमदार सामंत यांची भेट घेत आपल्या व्यथा मांडल्या, त्यावर सामंत यांनी स्पष्टपणे सांगितले की, विकास आराखडा पूर्णत्वास नेताना कोणावरही अन्याय केला जाणार नाही. सर्वांच्या हरकती लक्षात घेऊन व जनतेला विश्वासात घेऊनच विकास आराखड्यासंदर्भात निर्णय घेतले जातील. सर्वसामान्य जनतेचे नुकसान करून हा विकास आराखडा करण्यात येणार नाही, सर्वांचा योग्य तो न्याय दिला जाईल, असे आश्वासन यावेळी आमदार सामंत यांनी कुवे ग्रामस्थांनी दिले.
- अधिकाऱ्यांकडून शंकांचे निरसन
चर्चेदरम्यान शासकीय अधिकारीही उपस्थित होते. त्यामुळे नागरिकांनी आपले विविध प्रश्न अधिकाऱ्यांसमोर उपस्थित केल्यानंतर अधिकाऱ्यांनी त्यांच्या शंकाचे निरसन केले. बैठकीला मुख्याधिकारी तुषार बाबर, शिवसेना विधानसभा क्षेत्राध्यक्ष सुनील कुरूप, तालुकाप्रमुख गुरुप्रसाद देसाई, बाबा भिंगार्डे, मुन्ना खामकर, प्रसाद भाईशेट्ये, बाबा लांजेकर आदींसह इतर पदाधिकारी व कार्यकर्ते उपस्थित होते.
- सूचना…
▶ १५ दिवसात बदलण्याची मुख्याधिकाऱ्यांना सूचना
▶ मागण्यांसाठी कुवे ग्रामस्थांनी घेतली आमदार सामंतांची भेट, निवेदन सादर
