शाहू महाराज जयंती शासन स्तरावर साजरी करण्याची मागणी

बेळगाव : छत्रपती शाहू महाराज यांची जयंती राज्य शासनाच्यावतीने साजरी करण्यात यावी. तसेच महापालिकेच्यावतीने मंजूर करण्यात आलेले छत्रपती शाहू महाराज यांचा पुतळा राष्ट्रीय महामार्गानजीक लवकरात लवकर उभारण्यात यावा, अशी मागणी चलवादी महासभेच्यावतीने करण्यात आली. याबाबतचे निवेदन जिल्हाधिकाऱ्यांना देण्यात आले.  छत्रपती शाहू महाराज हे सामाजिक लोकशाहीचे संस्थापक होते. त्यांनी समाजातील अस्पृश्यता नष्ट करून मागासवर्गीयांना शिक्षण, सत्तेत समानता व सामाजिक दर्जा प्रदान केला. त्यांनी महात्मा जोतिबा फुले यांची सत्यशोधक सामाजिक चवळवळही सुरूच ठेवली. शिक्षणाचे महत्त्व ओळखून त्यांनी डॉ. बाबासाहेब आंबेडकर यांना शिक्षणासाठी परदेशी जाण्यासाठी मदत केली. सामाजिक क्रांतीमध्ये बदल घडवत समाजासाठी छत्रपती शाहू महाराज भक्कम आधारस्तंभापैकी एक आहेत. 26 जून रोजी त्यांची जयंती असल्याने शासनाने त्यांची जयंती कर्नाटक राज्यात प्रशासन स्तरावर साजरी करावी, अशी मागणी त्यांनी केली.