रत्नागिरी :
नव्या शैक्षणिक वर्षापूर्वीच पालकमंत्री उदय सामंत यांनी लक्ष घालून जिल्हा नियोजनमधून सन 2024-25 या वर्षात शाळा दुरुस्तीसाठी 3 कोटी 63 लाख रुपये मंजूर केले होते. आता तर या शैक्षणिक वर्षाला प्रारंभ झाला असताना जिल्हा वार्षिक योजनेतून प्राथमिक शाळांच्या विशेष दुरुस्तींतर्गत कार्यारंभ आदेश दिलेल्या 206 शाळांच्या कामांपैकी 130 कामे पूर्ण झालीत. त्यातील अजूनही 45 शाळांची कामे प्रगतीत तर 31 शाळांची कामे सुरू होण्याची प्रतीक्षा राहिली आहे.
जिल्हा परिषदेच्या काही प्राथमिक शाळा आधुनिक तंत्रज्ञानाची कास धरत डिजिटल झाल्या असल्या तरी काही शाळांच्या दुरुस्तीचा प्रश्न उभा आहे. मागील काही महिन्यांपूर्वी केलेल्या सर्वेक्षणानुसार रत्नागिरी जिल्हा परिषदेच्या ग्रामीण भागातील 211 प्राथमिक शाळांच्या दुरुस्तीची कामे जिल्हा वार्षिक योजना 2024-25 मध्ये मंजूर झाली होती. त्या कामांना प्रशासकीय मान्यताही देण्यात आली होती. प्राथमिक शाळांच्या इमारती नादुरुस्त बनल्याने नव्या शैक्षणिक वर्षात शाळेतील विद्यार्थ्यांच्या सुरक्षेच्या दृष्टीने त्या शाळांची दुरुस्तीची कार्यवाही सुरू करण्यात आली. त्या धोकादायक शाळांच्या दुरुस्तीसाठी जिल्हा नियोजन समितीकडून सुमारे साडेतीन कोटी मंजूर करण्यात आले होते.
नव्या शैक्षणिक वर्षापूर्वीच त्या शाळा दुरुस्त करण्यात येणार असल्याचे सांगण्यात आले होते. जिल्हा परिषदेच्या ग्रामीण भागातील प्राथमिक शाळांमध्ये गरीब तसेच सर्वसामान्यांची मुले शिक्षण घेतात. शाळांची गुणवत्ता सुधारावी, यासाठी शिक्षण विभागातर्फे विविध उपक्रम राबवण्यात येत आहेत. त्याचा चांगला परिणामही अलिकडच्या काळात दिसत आहे. मुलभूत सुविधा उपलब्ध करण्यावर भर असल्याचा दावा प्रशासनाकडून केला जात आहे. तर दुसरीकडे जिल्हा परिषदेच्या त्या शाळांच्या इमारती नादुरुस्त झाल्या असताना त्यांच्या दुरुस्तीची कार्यवाही अजूनही रखडलेली समोर येत आहे.
जिल्हा परिषदेच्या शिक्षण विभागाकडून शासनाकडे प्राथमिक शाळांच्या दुरुस्तीसाठी वेळोवेळी निधीची मागणी करण्यात आली आहे. या बाबत पालकमंत्री उदय सामंत यांनी लक्ष घालून जिल्हा नियोजनमधून निधीही उपलब्ध करून दिला होता. कार्यारंभ आदेश दिलेल्या जिल्ह्यातील एकूण 206 शाळांपैकी 130 प्राथमिक शाळांची कामे पूर्ण झाली आहेत. तर 45 शाळांची कामे प्रगतीत आणि 31 शाळांची कामे अजून सुरुच झाली नसल्याची बाब समोर येत आहे.
- शाळा दुरुस्तीची मंजूर आणि प्रशासकीय मान्यता दिलेल्या कामांची संख्या :
तालुका – मंडणगड-4, दापोली-22, खेड -63, चिपळूण-25, गुहागर-12, संगमेश्वर-28, रत्नागिरी-22, लांजा-9, राजापूर-26.
तालुका आदेश दिलेली कामे पूर्ण झालेली कामे प्रगतीत कामे सुरू कामे
मंडणगड 2 0 2 2
दापोली 21 8 8 5
खेड 63 47 9 7
चिपळूण 25 19 3 3
गुहागर 12 8 3 1
संगमेश्वर 28 16 8 4
रत्नागिरी 19 12 5 2
लांजा 8 7 1 0
राजापूर 26 13 6 7
- दुरुस्तीची कामे सुरू होताच शैक्षणिक कामकाजाला प्रारंभ
जिल्ह्यात प्राथमिक शाळांची जिल्हा वार्षिक योजनेतून मंजूर असलेली दुरुस्तीची कामे लवकरात-लवकर पूर्ण करण्याच्या दृष्टीने शिक्षण विभागाकडून प्रयत्न सुरू आहेत. काही कामे सुरू होण्यास थोडा विलंबही झाला. त्यामुळे ज्या ठिकाणी दुरुस्तीची कामे अद्याप सुरू आहेत, त्या शाळांच्या ठिकाणी स्थानिक पातळीवर शैक्षणिक कामकाजासाठी पर्यायी व्यवस्था करण्यात आली आहे. ती दुरुस्तीची कामे सुरू होताच पुन्हा त्या शाळांमध्ये नियमितपणे शैक्षणिक कामकाजाला प्रारंभ होईल, असे जि. प. रत्नागिरीचे प्राथमिक शिक्षणाधिकारी जयदेव कासार यांनी सांगितले.
