शहरात खेकड्यांची विक्री वाढली

बेळगाव : पावसाला सुरुवात झाली की खेकड्यांची विक्री जोमात सुरू होते. बेळगाव शहरात कॅम्प तसेच खासबाग येथे खेकड्यांची विक्री करण्यात येते. हिडकल जलाशयाच्या परिसरात मिळणारे खेकडे, विक्रीसाठी शहरात आणले जातात. खेकडे विक्रीसाठी आले असले तरी त्याचे दर मात्र अधिक असल्याने खरेदी करणाऱ्यांची संख्या अत्यल्प आहे. मागील आठवडाभरापासून मान्सूनपूर्व पावसाने धुमाकूळ घातला. त्यापाठोपाठ आता मान्सूनलाही सुरुवात झाली. मान्सूनला सुरुवात होताच खेकडे मिळण्यास सुरुवात होते. ग्रामीण भागात तलाव, ओहोळ, नद्यांमध्ये खेकडे मिळतात. त्यामुळे रात्रीच्या वेळी खेकडे पकडण्यासाठी युवा वर्गाची धडपड सुरू आहे. कॅम्प येथील फिश मार्केट समोरील रस्त्यावर खेकड्यांची विक्री केली जाते. सकाळी 8 वाजल्यापासून हिडकल येथील महिला खेकडे घेऊन शहरात दाखल होतात. सध्या आकारमानानुसार जोडीला 50 ते 80 रुपये दर आकारला जात आहे. खरेदी करणाऱ्यांची संख्या देखील अधिक आहे. सध्या अनेक हॉटेलमध्ये खेकडा थाळी मिळू लागल्याने हॉटेलमधून खेकड्यांची मागणी वाढली आहे. तसेच गोव्यामधून क्लस्टर केलेले खेकडे वर्षभर उपलब्ध होतात. परंतु पावसाळ्यातील खेकडे खाण्याकडे खवय्यांचा अधिक कल आहे.