चिपळूण :
तालुक्यात गुरुवारी झालेल्या वादळी पावसामुळे देवपाट येथे घरावर व कामथे येथील शौचालयावर झाड पडून सुमारे १ लाख ६० हजार रुपयांचे नुकसान झाले. मात्र शुक्रवारी पावसाचा जोर कमी झाला होता. सध्याचा अवकाळी व येत्या काही दिवसात सुरू होणारा नियमित पाऊस याचा विचार करता येथील तहसीलदार कार्यालयातील मुख्य नियंत्रण कक्ष २६ मेपासून सुरू होणार आहे.
तालुक्यात गुरुवारी सर्वत्र वादळी वाऱ्यासह जोरदार पाऊस कोसळला, यामुळे देवपाट येथील पांडुरंग सखाराम दुर्गोली, दीपक पांडुरंग दुर्गोली यांच्या घरावर कलमाचे झाड पडून त्यांचे १ लाख ५० हजार रुपयांचे नुकसान झाले. याचा वीरच्या तलाठ्यांनी पंचनामा केला आहे. तसेच कामथे-सिद्धार्थनगर येथील बाबू भाग्या जाधव यांच्या घराशेजारील शौचालयावर कलमाचे झाड पडल्याने त्यांचे सुमारे १० हजार रुपयांचे नुकसान झाले. याचाही संबंधित तलाठ्यांनी पंचनामा करून आपला अहवाल तहसीलदार कार्यालयाकडे पाठवला आहे. तसेच असुर्डे-कुटरे रस्त्यावरील पुलाला असलेल्या जोडरस्त्यावरून पाणी वाहत असल्याने तो वाहतुकीसाठी बंद करण्यात आला होता. शुक्रवारी पावसाचा जोर कमी झाला. दिवसभर रिपरिप सुरू होती. गुरुवारी तालुक्यात ९९.२२ मि. मी. पाऊस पडला असून त्यात चिपळूण मंडळात १०५, खेर्डी-१०२, वहाळ-१२५, कळकवणे-४०, मार्गताम्हाणे-१०६, शिरगांव-६९, रामपूर-१०३, असुर्डे-११०, सावर्डे-१३३ मि.मी. अशी नोंद झाली आहे. आकडेवारीनुसार रामपूर मंडळात अधिक तर कळकवणे मंडळात सर्वात कमी पाऊस पडल्याचे दिसत आहे. आतापर्यंत तालुक्यात १७९.६५ मि.मी. पाऊस पडला आहे. सध्याचा अवकाळी पाऊस व काही दिवसात सुरू होणारा नियमित पाऊस या पार्श्वभूमीवर २६ मेपासून तहसीलदार कार्यालयातील मुख्य नियंत्रण कक्ष सुरु करण्यात येणार आहे.
