झोया काझी, मानसी, श्रेया पोटे सामनावीर
बेळगाव : नागराज भगवंतन्नावर क्रिकेट अकादमी आयोजित हनुमान चषक महिलांच्या क्रिकेट स्पर्धेत एनसीएबी संघाने दोन्ही सामन्यातून विजय मिळवून हनुमान चषक पटकाविला. श्रेया पोटे, झोया काझी व मानसी मोरे यांना सामनावीर पुरस्कार देण्यात आले. एसकेई प्लॅटिनम ज्युबिली मैदानावर महिलांच्या त्रिशंकू क्रिकेट स्पर्धेचे उद्घाटन पुरस्कृर्ते आनंद चव्हाण, लता कित्तूर, बिंबा नाडकर्णी आदी मान्यवरांच्या हस्ते यष्टीचे पूजन करण्यात आले. पहिल्या सामन्यात व्हीईसीए संघाने प्रथम फलंदाजी करताना 20 षटकात 6 गडी बाद 149 धावा केल्या. श्रेया पोटेने 5 चौकारासह 75, वैष्णवीने 20 तर निधी पाटीलने 14 धावा केल्या. एनसीएआरतर्फे गिरीजा के.ने 3 तर नंदिनीने 2 गडी बाद केले. प्रत्युत्तरादाखल खेळताना एनसीएबीने 19 षटकात 5 गडी बाद 150 धावा करुन सामना 5 गड्यांनी जिंकला. त्यात मानसी मोरेने 8 चौकारासह 87 तर झोया काझीने 7 चौकारासह 47 धावा केल्या.
दुसऱ्या सामन्यात एनसीएबीने प्रथम फलंदाजी करताना 20 षटकात 1 गडी बाद 134 धावा केल्या. झोया काझीने 8 चौकारासह 67, मानसी मोरेने 6 चौकारासह 58 तर व्हीईसीएतर्फे नंदिनीने 1 गडी बाद केला. प्रत्युत्तरादाखल खेळताना व्हीईसीए संघाने 20 षटकात 5 गडी बाद 95 धावाच केल्या. त्यात श्रेया पोटेने 2 चौकारासह 22, अनवीने 2 चौकारासह 19, वैष्णवीने 3 चौकारासह 24 तर ऐश्वर्याने 11 धावा केल्या. एनसीएबीतर्फे झोया काझीने 2, गिरीजा, नंदिनी व जानवीने प्रत्येकी 1 गडी बाद केला. सामन्यानंतर प्रमुख पाहुणे माजी प्राचार्या माधुरी शानभाग, सुरेखा हेरेकर, आनंद सराफ, विवेक पाटील, नागराज भगवंतन्नावर आदी मान्यवरांच्या हस्ते विजेत्या एनसीएबी व उपविजेत्या व्हीईसीए संघाला चषक व प्रमाणपत्र देवून गौरविण्यात आले. मानसी मोरे उत्कृष्ट फलंदाज, गिरीजा कदम उत्कृष्ट गोलंदाज, उत्कृष्ट झेल माही कंग्राळकर, उत्कृष्ट क्षेत्ररक्षक पद्मश्री साबन्नावर यांना चषक देवून गौरविण्यात आले.
