बारामुल्लातील हाजी पीर सेक्टरमध्ये चकमक
वृत्तसंस्था/ . श्रीनगर
जम्मू काश्मीरमधील बारामुल्ला जिल्ह्यात नियंत्रण रेषेवर (एलओसी) घुसखोरीचा प्रयत्न हाणून पाडताना दोन दहशतवाद्यांचा खात्मा करण्यात आला. पहलगाम दहशतवादी हल्ल्याच्या एक दिवसानंतर ही कारवाई करण्यात आली. लष्कराने चकमकीची पुष्टी केली आणि परिसरात अजूनही शोधमोहीम सुरू आहे. दहशतवाद्यांनी बारामुल्लामधील हाजी पीर सेक्टरमध्ये घुसखोरी करण्याचा प्रयत्न करत असताना चकमक सुरू झाली, असे ‘एक्स’वरील पोस्टमध्ये चिनार कॉर्प्सने म्हटले आहे.
बारामुल्ला येथे सुरक्षा दल आणि दहशतवाद्यांमध्ये चकमक झाली. या संघर्षादरम्यान जोरदार गोळीबार झाला. नियंत्रण रेषेवर तैनात असलेल्या सतर्क सैनिकांनी घुसखोरांना इशारा देत त्यांना रोखल्यामुळे गोळीबार झाला. यापूर्वी मंगळवारी दक्षिण काश्मीरमधील अनंतनाग जिह्यातील पहलगाम येथे झालेल्या प्राणघातक दहशतवादी हल्ल्याच्या 24 तासांपेक्षा कमी वेळात घुसखोरीचा हा प्रयत्न झाला आहे. पहलगाममधील दहशतवादी हल्ल्यात किमान 26 जणांचा मृत्यू झाला, त्यात बहुतेक पर्यटक होते.
