दीड लाख ग्राहकांना मिळणार वीज बिलात सवलत

कोल्हापूर / कृष्णात चौगले :

विद्युत नियामक आयोगाच्या आदेशानुसार महावितरणकडून 1 एप्रिल 2025 पासून सर्व वर्गवारीतील ग्राहकांसाठी सरासरी 10 टक्के वीज दर कपात केले जाणार आहेत. मात्र या निर्णयाचा लाभ सर्वच ग्राहकांना होणार नसून तो फक्त ‘टीओडी मीटर’ असलेल्या ग्राहकांनाच होणार आहे. कोल्हापूर परिमंडलात (कोल्हापूर, सांगली जिल्हा) एकूण 1 लाख 59 हजार 664 लघु विद्युत दाब ग्राहकांनी (घरगुती आणि व्यावसायिक) टीओडी (टाईम ऑफ डे) मीटर बसविले असून या ग्राहकांनाच महावितरणच्या वीज दर कपातीचा फायदा होणार आहे.

महावितरणने सर्व निवासी ग्राहकांच्या टप्यांच्या वीज दरांमध्ये 10 ते 12 टक्क्यांच्या श्रेणीत एकूण कपात केली आहे. वीज वापर टप्पा (1-100 युनिट्स) असलेल्या निवासी ग्राहकांसाठी वीज दरांमध्ये आर्थिक वर्ष 2029-30 पर्यंत सुमारे 24 टक्के कपात केली जाणार आहे. पण घरगुती वीज वापरणाऱ्या बहुतांशी ग्राहकांकडे बसविलेल्या मीटरमध्ये टीओडीची सुविधा नाही. टीओडी सुविधा (वीज दर सवलत) मिळण्यासाठी वीज ग्राहकाने कोणत्या वेळेला विजेचा वापर केला हे समजणे आवश्यक आहे. घरगुती ग्राहकांना टीओडी सवलतीचा लाभ घेता यावा यासाठी महावितरणकडून मोफत टीओडी (स्मार्ट) मीटर बसवून देण्यात येणार आहेत. त्यामुळे घरगुती आणि व्यावसायिक ग्राहकांनी टीओडी मीटर बसवून वीज दर सवलतीचा लाभ घ्यावा असे आवाहन महावितरणच्यावतीने केले आहे.

• वीज बिल सवलतीसाठी बसवावे लागणार टीओडी मीटर

जिह्यात सुमारे 9 लाखांहून अधिक लघुदाब ग्राहक आहेत. त्यापैकी सध्या फक्त 94 हजार ग्राहकांनी (10 टक्के) टीओडी मीटर बसविले आहेत. म्हणजेच उर्वरित 8 लाख ग्राहकांना (90 टक्के) वीज सवलत मिळवण्यासाठी टीओडी मीटर बसवावे लागणार आहेत. महावितरणकडून ही मीटर मोफत बसवून दिली जाणार आहेत. वीज गळती आणि वीज चोरी रोखण्यासाठी टीओडी मीटर फायदेशीर ठरणार असल्यामुळेच ती मोफत दिली जाणार असल्याचा महावितरणचा दावा आहे.

• टीओडी मीटरच्या वीज जोडण्या (सद्यस्थिती)

कोल्हापूर मंडळ

विभाग              बदललेली वीज मीटर             नवीन वीज जोडण्या              पी.एम.सुर्यघर जोडण्या

गडहिंग्लज                 19485                                        962                                    173

इचलकरंजी               12922                                        1046                                  606

जयसिंगपूर                12635                                        1250                                 774

कोल्हापूर ग्रा.1             17046                                        1772                                  518

कोल्हापूर ग्रा.2              16635                                       2062                                598

कोल्हापूर अर्बन           15827                                       1633                                 877

कोल्हापूर एकूण          94550                                        8725                               3546

सांगली मंडळ

विभाग                  बदललेली वीज मीटर                  नवीन वीज जोडण्या           पी.एम.सुर्यघर जोडण्या

इस्लामपूर                   10199                                          1024                            451

कवटेमहांकाळ              7294                                            1270                            87

सांगली ग्रा.                      10829                                          1190                          297

सांगली शहर                  7088                                           1691                          840

विटा                             9358                                         1036                           219

सांगली एकूण                   44768                                      6211                           1894

कोल्हापूर प.मं.                     139318                                  14936                           5440