4 टक्के घरपट्टी वाढीवर निर्णय होण्याची शक्यता : विविध विषयांवर होणार चर्चा
बेळगाव : महानगरपालिकेची सर्वसाधारण सभा 5 एप्रिल रोजी सकाळी 11 वा. महापालिकेच्या मुख्य सभागृहात आयोजित करण्यात आली आहे. या सभेत तब्बल 12 विषयांवर चर्चा केली जाणार आहे. विशेष करून अर्थ स्थायी समितीच्या शिफारसीनुसार 4 टक्के घरपट्टी वाढीचा प्रस्ताव देण्यात आला असून सर्वसाधारण बैठकीत यावर चर्चा करून घरपट्टी वाढीबाबत निर्णय घेतला जाणार आहे. हा निर्णय झाल्यास शहरातील मिळकतदारांना आर्थिक भुर्दंड सहन करावा लागणार आहे. नूतन महापौर मंगेश पवार यांच्या अध्यक्षतेखाली ही पहिलीच सर्वसाधारण सभा असणार आहे.
गेल्या दोन वर्षांपासून घरपट्टी वाढीबाबत चर्चा केली जात आहे. मात्र यावेळच्या सर्वसाधारण सभेत 4 टक्के घरपट्टी वाढीवर निर्णय होण्याची शक्यता आहे. महापालिकेचा यंदाचा अर्थसंकल्प 80 कोटींचा असून विविध विकासकामे राबविण्यासाठी निधीची कमतरता भासत आहे. शहराच्या पाणीपुरवठ्याची जबाबदारी सोपविण्यात आलेल्या एलअँडटी कंपनीला 24 तास पाणीपुरवठा योजना राबविण्यासाठी मोठा निधी देणे बाकी असल्याने वेगवेगळ्या माध्यमातून उत्पन्न वाढविण्यासाठी प्रयत्न सुरू आहे. त्यातच महापालिका आयुक्तांनी सध्याची शहरातील घरपट्टी आकारणी जुन्या काळातील असून ती वाढविणे आवश्यक असल्याचे म्हटले होते.
4 टक्के घरपट्टी वाढल्यास त्याचा भार मिळकतदारांवर पडणार आहे. शनिवारच्या सर्वसाधारण सभेत 5 डिसेंबर 2024 रोजी झालेल्या सर्वसाधारण सभेचे इतिवृत्त वाचून त्याला मंजुरी देणे त्याचबरोबर अर्थ स्थायी समिती, आरोग्य स्थायी समिती, कर स्थायी समिती, बांधकाम स्थायी समित्यांच्या बैठकांमध्ये झालेल्या निर्णयाचे वाचन केले जाणार आहे. प्रभाग क्र. 51 मध्ये डॉ. बाबासाहेब आंबेडकर यांच्या प्रतिमेची प्रतिष्ठापना करण्याबाबत आरोग्य स्थायी समितीच्या बैठकीत निर्णय घेण्यात आला होता. तो प्रस्ताव मांडण्यात येणार आहे.
शहरातील जाहिरात फलक शुल्क वसूल करणे, ई-आस्थिमध्ये मालकाचे नाव नमूद करणे, महात्मा फुले रोडवरील गटार काम करून स्वच्छता करणे, ऑटोनगरमधील बेकायदा रस्त्याबाबत चर्चा करणे, कंत्राटी पद्धतीने कायदा सल्लागाराची नियुक्ती करणे, गोवावेस रेल्वे उड्डाण पुलावर बसवेश्वर यांच्या नावाचा फलक लावणे, छत्रपती शिवाजी महाराज कपिलेश्वर उड्डाणपुलावर फलक उभारणे, पावसाळ्यापूर्वी धोकादायक झाडे हटविणे, पथदीपांची देखभाल, बसथांब्यावर जाहिरातीच्या माध्यमावरून कर वसूल करणे आदी विषयांवर या सभेत चर्चा केली जाणार आहे. त्याचबरोबर यापूर्वी बुडाकडे असलेल्या रामतीर्थनगरचे महानगरपालिकेकडे हस्तांतर करण्यात आले आहे. याला मंजुरी देणे यासह अध्यक्षांच्या परवानगीने येणाऱ्या इतर विषयांवर चर्चा केली जाणार आहे.
