वडूज :
ऊसतोडीच्या पैशाच्या कारणावरून चुलत्याचा खून केल्याप्रकरणी वडूज येथील अतिरिक्त जिल्हा व सत्र न्यायालयाने पुतण्यास जन्मठेपेची शिक्षा सुनावली. संदीप वसंत चव्हाण (वय 28) रा. कारंडेवाडी (कुकुडवाड, ता. माण) असे शिक्षा झालेल्या आरोपीचे नाव आहे.
त्याने चुलते लक्ष्मण आण्णा चव्हाण (वय 49) रा. कारंडेवाडी (कुकुडवाड) यांचा दि. 19 मे 2020 रोजी पहाटे तीन वाजण्याच्या सुमारास कारंडेवाडी येथे मयताचे राहते घराचे समोर खून केला होता.
या खटल्याची थोडक्यात हकीकत अशी, कारंडेवाडी येथे आरोपी संदीप चव्हाण याने त्याचा चुलता मयत लक्ष्मण चव्हाण याच्यासोबत ऊस तोडीचे पैशाचे कारणावरून भांडण करून मयत हे त्यांचे घराचे अंगणात झोपलेले असताना चिडून जाऊन घरातील मटण कापण्याचा सुरा घेऊन त्याने मयत यांचे गळ्यावर सुरा मारून गंभीर जखमी करून खून केला म्हणून त्याच्या विरोधात म्हसवड पोलीस ठाण्यात गुन्हा दाखल करण्यात आला.
सदर गुह्यात सहा.पो.नि.श्री. गणेश वाघमोडे यांनी साक्षीदारांचे जाब–जबाब नोंदवले तसेच वैद्यकीय पुरावे जमा केले व कसून तपास करून आरोपींविरुद्ध जिल्हा सत्र न्यायालय, वडुज येथे दोषारोपपत्र दाखल केले. वडूज येथील अति. जिल्हा व सत्र न्यायालयात याकामी सरकारी पक्षाच्या वतीने सरकारी वकील अजित प्रताप कदम (साबळे) यांनी काम पाहिले. यामध्ये सरकार पक्षाच्या वतीने 8 साक्षीदार तपासण्यात आले. साक्षीदारांचे जाब–जबाब, कागदोपत्री पुरावा, वैद्यकीय पुरावा व सरकारी वकिलांचा युक्तिवाद ग्राह्य धरून जिल्हा व सत्र न्या. आर. व्ही. हुद्दार यांनी आरोपीला भा.द.वि.स कलम 302 अन्वये दोषी ठरवून आरोपी संदीप चव्हाण यास भा.द.वि.स कलम 302 अन्वये जन्मठेप व 5000 रू दंड व दंड न भरल्यास 6 महिने साधी कैद अशी शिक्षा सुनावली.
सदर खटला चालवणे कामी उपविभागीय पोलीस अधिकारी अश्विनी शेंडगे, स.पो.नि. अक्षय सोनवणे म्हसवड पोलीस ठाणे यांनी मार्गदर्शन केले. तसेच प्रॉसिक्युशन स्क्वॉड पो. उप. नि. दत्तात्रय जाधव, म.पो. हवालदार विजयालक्ष्मी दडस, पो. कॉ. 585 सागर सजगणे, पो. कॉ. 292 अमीर शिकलगार, पो.कॉ. 2414 जयवंत शिंदे यांनी सहकार्य केले.
