कराड :
वाठार (ता. कराड) येथील पेट्रोल पंपावर दरोडा टाकणाऱ्या चौघांना कराड तालुका गुन्हे प्रकटीकरण शाखेच्या पथकाने मोठ्या शिताफीने ताब्यात घेतले. पेट्रोल पंपावरील कामगारच या दरोड्यामध्ये सहभागी असल्याचे निष्पन्न झाले. तर दोघेजण रेकॉर्डवरील गुन्हेगार आहेत. तर एकजण विधीसंघर्ष बालक आहे. पोलिसांनी संशयितांकडून चोरीस गेलेली रोख रक्कम, गुह्यात वापरलेली दुचाकी व चार मोबाईल असा मुद्देमाल हस्तगत केला आहे. त्यातील तिघांना आज न्यायालयात हजर केले असता न्यायालयाने 20 मार्चपर्यंत पोलीस कोठडी सुनावली आहे. रोहित उर्फ दाद्या सुदाम कदम (रा. सांगली), किशोर चव्हाण व परशुराम दुपटे दोघेही (रा. आटके, ता. कराड) अशी अटक केलेल्या संशयितांची नावे आहेत, अशी माहिती तालुका पोलीस ठाण्याचे पोलीस निरीक्षक महेंद्र जगताप यांनी पत्रकार परिषदेत दिली.
महेंद्र जगताप म्हणाले की, वाठार गावच्या हद्दीतील श्री गणेश पेट्रोल पंपावर सोमवारी रात्री दोघांनी दुचाकीवरून येऊन पेट्रोल भरण्याचा बहाणा करीत पंपावरील कामगारावर कोयत्याने हल्ला करून त्यांची पैशाची बॅग हिसकावून घेऊन पळून गेले होते. याबाबत तालुका पोलीस ठाण्यात तक्रार दाखल झाली होती. घटनास्थळी अपर पोलीस अधीक्षक डॉ. वैशाली कडूकर, डीवायएसपी अमोल ठाकूर यांनी भेट दिली होती. पोलीस अधीक्षक समीर शेख यांनी गुन्हा उघडकीस आणण्याच्या सूचना दिल्या होत्या.
पोलीस निरीक्षक महेंद्र जगताप यांच्या दोन टीम व स्थानिक गुन्हे शाखेची एक टीम अशा तीन टीम संशयितांचा शोध घेत होत्या. पेट्रोल पंपावरील मिळालेल्या सीसीटीव्ही फुटेजमध्ये दिसणाऱ्या संशयित आरोपीची सांगली स्थानिक गुन्हे शाखेच्या मदतीने ओळख पटवण्यात कराड पोलिसांना यश आले. त्यानंतर तांत्रिक माहितीच्या आधारे पोलीस संशयितांचा शोध घेत होते. संशयित रेकॉर्डवरील असल्याने वेळोवेळी आपले लोकेशन बदलत होते. गुन्हे प्रकटीकरण शाखेचे प्रमुख सहाय्यक पोलीस निरीक्षक बिराजदार व त्यांची टीम सातारा, सांगली, कोल्हापूर, रत्नागिरी अशी चार जिह्यात संशयिताचा पाठलाग करीत होती. त्यानंतर रोहित कदम यास ताब्यात घेतले. त्याच्याकडे विचारपूस करत असता सुरूवातीस तो उडवाउडवीची उत्तरे देत होता. त्यानंतर पोलिसांनी खाक्या दाखवताच त्याने मीच मोटारसायकलवरून येऊन हल्ला करून पैशाची बॅग हिसकावून घेवून घेतल्याची कबुली दिली.
कदम याच्याबरोबर मोटार सायकल चालविणारा आगाशिवनगर येथील असल्याचे त्याने सांगितले. त्याला ताब्यात घेऊन चौकशी केली असता सदर प्रकरणाचा मुख्य सूत्रधार किशोर चव्हाण असल्याचे त्याने सांगितले. किशोर चव्हाण याला ताब्यात घेऊन विचारपूस केली असता पेट्रोल पंपावर काम करणारा परशुराम दुपटे याच्याशी किशोर याने संगनमत करून गुन्हा केल्याचे कबूल केले. पोलिसांनी त्यांच्याकडून चोरीस गेलेली रोख रक्कम, एक दुचाकी व चार मोबाईल हस्तगत करून तिघांना अटक केली. रविवारी त्यांना न्यायालयात हजर केले असता न्यायालयाने 20 मार्चपर्यंत पोलीस कोठडी सुनावली आहे. अधिक तपास सहाय्यक पोलीस निरीक्षक सखाराम बिराजदार करीत आहेत.
सदरची कारवाई पोलीस अधीक्षक समीर शेख, अपर पोलीस अधीक्षक डॉ. वैशाली कडूकर, डीवायएसपी अमोल ठाकूर व पोलीस निरीक्षक महेंद्र जगताप यांच्या मार्गदर्शनाखाली गुन्हे प्रकटीकरण शाखेचे सखाराम बिराजदार, सहाय्यक पोलीस उपनिरीक्षक नितीन येळवे, पोलीस हवालदार सचिन निकम, उत्तम कोळी, विनोद माने, किरण बामणे, रवींद्र देशमुख, प्रफुल्ल गाडे, मोहित गुरव यांनी केली.
