प्रतिनिधी/ शेवगाव, अहिल्यानगर
हिरकमहोत्सवी पुरुष व महिला राज्य अजिंक्यपद व निवड चाचणी खो-खो स्पर्धेत दुसऱ्या दिवशी सकाळच्या सत्रात साखळी सामन्यात पुरुष गटात धाराशिव, सोलापूर, सांगली यांनी तर महिला गटात धाराशिव, मुंबई उपनगर व रत्नागिरी यांनी विजय मिळवत गटात अव्वल स्थान मिळवले आहे. अहिल्यानगर शेवगाव येथे होत असलेल्या हिरकमहोत्सवी पुरुष व महिला राज्य अजिंक्यपद व निवड चाचणी खो-खो स्पर्धा खंडोबा क्रिडांगणावर सुरु आहे.
आज सकाळच्या सत्रात महिला गटात धाराशिव संघाने छ. संभाजीनगरचा 1 डाव 17 गुणांनी (22-5) पराभव केला. विजयी संघातर्फे मिताली पवार (3.40 मि. संरक्षण), संध्या सुरवसे (3 मि. संरक्षण व 4 गुण) यांनी चांगला खेळ केला. दुसऱ्या सामन्यात रत्नागिरीने जालन्याचा 12-9 एक डाव 3 गुणांनी पराभव केला. विजयी संघातर्फे रिद्धी चव्हाण (3 मि. संरक्षण व 2 गुण), अपेक्षा सुतार (2 मि. संरक्षण व 2 गुण), पायल पवार (1 मि संरक्षण व 2 गुण) यांनी चांगला खेळ केला. तिसऱ्या सामन्यात फ गटात मुंबई संघाने सातारा संघाचा एक गुणाने (10-9) पराभव केला.
पुरुष गटात धाराशिव, सोलापूर, सांगलीचा शानदार विजय
पुरुष गटात धाराशिवने धुळ्याचा एक डाव 8 गुणांनी (17-9) सहज पराभव केला. धाराशिव तर्फे हार्द्या वसावे (2.20 मि., 3.30 मि. संरक्षण), विजय शिंदे 1 मि. संरक्षण व 5 गुण), सचिन पवार (2.40 मि. संरक्षण व 1 गुण), भगतसिंग वसावे (1.30, 1 मि. संरक्षण व 1 गुण) यांनी चांगला खेळ केला. दुसऱ्या सामन्यात सोलापूरने नंदुरबारचा एक डाव एक गुणाने (12-11) पराभूत केले. सोलापूरकडून अजय कश्यप (3.30 मि. संरक्षण व 2 गुण), जुबेर शेख (1.30 मि. संरक्षण व 3 गुण) यांनी चांगला खेळ केला. तिसऱ्या सामन्यात सांगलीने सात्रायाचा 1 डाव 4 गुणांनी (16-12) पराभव केला. यजमान अहिल्यानगरने नाशिकचा 2 गुण व 5 मि. 40 सेकंद राखून (13-11) विजय मिळवला.
नामांकित खेळाडूंचा सहभाग
प्रसिद्ध अल्टीमेट खो-खो स्पर्धा आणि नुकत्याच दिल्ली येथे झालेल्या जागतिक खो-खो स्पर्धेचे विजेतेपद पटकावणाऱ्या भारतीय संघात सहभागी महाराष्ट्रातील खेळाडू प्रतीक वाईकर, प्रियांका इंगळे, सुयश गरगटे, अनिकेत पोटे, रेश्मा राठोड, अश्विनी शिंदे हे विविध संघातून या स्पर्धेत सहभागी झालेले आहेत. त्यांचा खेळ पाहण्यासाठी अहिल्यानगरवासियांनी खंडोबा मैदानावर यावे, असे आवाहन अहमदनगर खो-खो असोसिएशन तर्फे करण्यात आले आहे.
