पंतप्रधान मोदींशी द्विपक्षीय चर्चा करणार : 17-18 रोजी दोन दिवशीय दौरा
वृत्तसंस्था/ नवी दिल्ली
कतारचे अमीर शेख तमीम बिन हमद अल थानी भारत दौऱ्यावर येणार आहेत. त्यांचा दौरा 17-18 फेब्रुवारी रोजी निश्चित झाला असून सोमवारी भारतात आगमन होईल. भारताच्या दौऱ्यावर येणारे कतारचे अमीर हे पंतप्रधान नरेंद्र मोदी यांच्याशी द्विपक्षीय चर्चा करतील. तसेच ते राष्ट्रपती द्रौपदी मुर्मू यांचीही भेट घेतील.
शेख तमीम बिन हमद अल थानी यांचे 18 फेब्रुवारी रोजी राष्ट्रपती भवनात औपचारिक स्वागत केले जाईल. कतारच्या अमीरसोबत एक उच्चस्तरीय शिष्टमंडळ असणार आहे. त्यात ज्येष्ठ मंत्री, प्रशासकीय अधिकारी आणि व्यावसायिक शिष्टमंडळांचे प्रतिनिधी असतील. विविध क्षेत्रांमध्ये द्विपक्षीय संबंध अधिक दृढ करण्यासाठी दोन्ही देशांच्या वरिष्ठ नेत्यांमध्ये चर्चा अपेक्षित आहे. भारत आणि कतार दोन्ही देशांमध्ये मजबूत संबंध आहेत. कतारमध्ये मोठ्या संख्येने भारतीय प्रवासी राहतात. सद्यस्थितीत कतारमध्ये सुमारे आठ लाख भारतीय नागरिक असून ते वैद्यकीय, अभियांत्रिकी, शिक्षण, वित्त आणि कामगार अशा विविध क्षेत्रात योगदान देत आहेत.
भारतासाठी कतार महत्त्वाचा देश
कतार हा भारताचा सर्वात मोठा एलएनजी पुरवठादार आहे. 2022-23 या आर्थिक वर्षात भारताचा कतारसोबतचा द्विपक्षीय व्यापार सुमारे 18.77 अब्ज अमेरिकन डॉलर्स इतका होता. कतारचे ऊर्जा मंत्री साद शेरिदा अल-काबी यांनी या महिन्याच्या सुरुवातीला इंडिया एनर्जी वीकसाठी भारताला भेट दिली. आपल्या भेटीदरम्यान, अल-काबी यांनी भारताच्या ऊर्जेच्या गरजा पूर्ण करण्यासाठी कतारच्या वचनबद्धतेवर भर दिला होता.
एस. जयशंकर यांची बऱ्याचदा कतारला भेट
भारत आणि कतारमधील संबंध वाढवण्याच्या उद्देशाने परराष्ट्रमंत्री एस. जयशंकर यांनी एका वर्षात चारवेळा कतारला भेट दिली आहे. या काळात त्यांनी अनेक द्विपक्षीय बैठकांमध्ये भाग घेत कतारचे अमीर शेख तमीम हमद अल थानी यांच्या भारत भेटीच्या तयारीला अंतिम स्वरूप दिले. यापूर्वी, गेल्यावर्षी फेब्रुवारी 2024 मध्ये पंतप्रधान नरेंद्र मोदी यांनी शेख अल थानी यांची भेट घेत त्यांना भारत भेटीचे आमंत्रणही दिले होते.
