प्रयागराजमध्ये दुर्घटना : बोलेरो-बसची धडक
वृत्तसंस्था/ प्रयागराज
उत्तर प्रदेशातील प्रयागराज येथे महाकुंभमेळ्यात स्नान करण्यासाठी जाणाऱ्या भाविकांच्या वाहनाला शनिवारी पहाटे भीषण अपघात झाला. बोलेरो आणि बसमध्ये जोरदार टक्कर झाल्यामुळे 10 जणांचा मृत्यू झाल्याचे सांगण्यात आले. या भीषण अपघातात अन्य 19 भाविक जखमी झाल्याची माहिती समोर आली आहे. प्रयागराज-मिर्झापूर महामार्गावरील मेजा परिसरात हा अपघात झाला. दुर्घटनेची दखल घेत मुख्यमंत्री योगी यांनी अधिकाऱ्यांना आवश्यक सूचना दिल्या आहेत.
छत्तीसगडमधील कोरबा जिल्ह्यातील भाविक संगममध्ये स्नान करण्यासाठी जात असताना हा अपघात झाला. शुक्रवार-शनिवार रात्री 2 वाजण्याच्या सुमारास प्रयागराजमधील मेजा परिसरात हा भीषण अपघात घडला. एका भरधाव वेगाच्या बोलेरोची बसला धडक बसली. ही टक्कर इतकी भीषण होती की बोलेरोचा दर्शनी भाग पूर्णपणे तुटला. बोलेरोचा चुराडा झाला. मृत्युमुखी पडलेले सर्व भाविक बोलेरोमधून प्रवास करत होते. घटनेची माहिती मिळताच पोलीस घटनास्थळी पोहोचले. जखमींना तातडीने उपचारासाठी स्थानिक रुग्णालयात पाठवण्यात आले. गंभीर जखमींना जिल्हा रुग्णालयात दाखल करण्यात आले आहे.
