कराड :
उंडाळे (ता. कराड) येथील स्वातंत्र्यसेनानी दादा उंडाळकर स्मारक समितीच्या वतीने स्वातंत्र्यवीर दादा उंडाळकर यांच्या 51 व्या स्मृतीदिनानिमित्त 42 वे स्वातंत्र्य संग्राम सैनिक अधिवेशन व माजी सैनिक मेळावा मंगळवारी 18 आयोजित केला आहे. या कार्यक्रमात यावर्षीचा मानाचा स्वातंत्र्यवीर दादा उंडाळकर सामाजिक पुरस्कार रॅमन मॅगसेसे पुरस्कार प्राप्त मानसोपचार तज्ञ डॉ भरत वतवाणी यांना समारंभपूर्वक प्रदान करण्यात येणार आहे. प्रमुख पाहुणे माजी खासदार, निवृत्त ब्रिगेडियर सुधीर सावंत यांच्या हस्ते पुरस्काराचे वितरण होणार आहे. 51 हजार रूपये रोख, स्मृतीचिन्ह, मानपत्र, शाळ, श्रीफळ असे पुरस्कारचे स्वरूप आहे.
दादा उंडाळकर स्मारक समितीचे विश्वस्त व रयत सहकारी साखर कारखान्याचे चेअरमन अॅड. उदयसिंह पाटील व व्यवस्थापकीय विश्वस्त प्रा. गणपतराव कणसे यांनी पत्रकार परिषदेत ही माहिती दिली. यावेळी प्रा. धनाजीराव काटकर यांची उपस्थिती होती. मंगळवार 18 रोजी दुपारी दोन वाजता स्वा. दादा उंडाळकर स्मारक मंदिर उंडाळे येथे अधिवेशनात पुरस्काराचे वितरण होणार आहे.
डॉ. भरत वतवाणी यांचे रस्त्याने फिरणाऱ्या मनोरुग्णांबाबत मोठे कार्य असून त्यांनी आजपर्यंत तब्बल 7 हजार रुग्णांवर उपचार करून त्यांना त्याच्या घरी पाठवले आहे. वतवाणी यांचा जन्म कलकत्ता येथील तर त्याचे शिक्षण मुंबई येथे झाले. 1988 पासून त्यांनी मनोरुग्णासाठी श्रद्धा पुनवर्सन केंद्र स्थापन केले. आज कर्जत येथे ही केंद्र सुरू असून 120 मनोरुग्ण उपचार घेत आहेत. या कार्याची दखल घेऊन सन 2018 मध्ये फिलीफाईन सरकारने त्यांचा रॅमन मॅगसेसे पुरस्काराने गौरव केला आहे. या वतवाणी यांचा यावर्षीचा दादा उंडाळकर सामाजिक पुरस्कार देऊन गौरव करण्यात येणार आहे.
माजी मंत्री विलासराव पाटील–उंडाळकर यांनी वडील स्वातंत्र्य सेनानी दादा उंडाळकर यांच्या स्मृतीप्रित्यर्थ राज्यस्तरीय स्वातंत्र सैनिकांचे अधिवेशन व समाजप्रबोधन कार्यक्रम सुरू केले होते. 1973 पासून ही परंपरा अखंड सुरू आहे. उंडाळकर यांच्या पश्चात स्मारक समितीने अॅड. उदयसिंह पाटील याच्या नेतृत्वाखाली ही परंपरा पुढे सुरू ठेवली आहे. स्व. विलासराव उंडाळकर यांच्यावर महात्मा गांधी यांच्या विचारांचा प्रभाव होता.
स्वातंत्र्यवीर दादा उंडाळकर सामाजिक पुरस्काराने आत्तापर्यंत विविध क्षेत्रातील मान्यवरांना सन्मानित करण्यात आले आहे. यामध्ये स्वातंत्र सेनानी माजी राजदूत एन. जी. गोरे, सुप्रसिध्द कवी ना. धो. महानोर, स्वातंत्र्य सेनानी श्रीमती उषा मेहता, स्वा. से. गोविंदभाई श्रॉफ, सामाजिक कार्यकर्त्या श्रीमती नीलमताई देशपांडे, सामाजिक कार्यकर्ते मोहन धारिया, साहित्यिक जी. पी. प्रधान, शास्त्रज्ञ डॉ. वसंतराव गोवारीकर, सामाजिक कार्यकर्ते अण्णा हजारे, सामाजिक कार्यकर्ते शांताराम गरूड, शिक्षण तज्ञ प्राचार्य पी. बी. पाटील, स्वा. सै. प्रभाकरराव कुंटे, न्यायमूर्ती पी. बी. सावंत, कृषीतज्ञ डॉ. जयंत पाटील, पत्रकार पी. साईनाथ, प्रसिध्द वकील अॅड. उज्ज्वल निकम, डॉ. अभय बंग, जे.जे. रूग्णालयाचे नेत्रतज्ञ तात्याराव लहाने, नाबार्डचे माजी अध्यक्ष यशवंतराव थोरात, अर्थशास्त्रज्ञ नीळकंठ रथ, लेखक व विचारवंत डॉ. सदानंद मोरे, डॉ. प्रकाश आमटे, स्वातंत्र्य सेनानी भाई वैद्य, लेखक सुरेश व्दादशीवार, डॉ. विवेक सावंत, पद्मश्री डॉ.गणेश देवी, पद्मश्री प्रतापसिंह जाधव, अभिनेते मकरंद अनासपुरे, अशोक जैन यांचा समावेश आहे. कार्यक्रमास स्वातंत्र्य सैनिक, स्वातंत्र्य सैनिकांचे वारसदार, माजी सैनिक उपस्थित राहणार असून तालुक्यातील शेतकरी, माजी सैनिक, युवक, महिला यांनी मोठ्या संख्येने उपस्थित राहावे, असे आवाहन स्वा दादा उंडाळकर स्मारक समितीच्या वतीने अॅड. उदयसिंह पाटील–उंडाळकर यांनी केले.
