‘गांधी भारत, नवनिर्माण गांधी भारत’ पुस्तकांचे प्रकाशन

बेळगाव : 1924 मध्ये बेळगावात महात्मा गांधीजी यांच्या अध्यक्षतेत झालेल्या काँग्रेस अधिवेशनात झालेले निर्णय, अध्यक्षीय भाषण, काही दुर्मीळ छायाचित्रे माहिती व जनसंपर्क खात्याने संग्रहित केली आहेत. खात्याने ‘गांधी भारत व नवनिर्माण गांधी भारत’ या शीर्षकाखाली दोन पुस्तके मुद्रित केली आहेत. या पुस्तकांचे प्रकाशन मुख्यमंत्री सिद्धरामय्या, राज्यसभेचे विरोधी पक्षनेते मल्लिकार्जुन खर्गे यांच्या हस्ते मंगळवारी करण्यात आले. सुवर्णसौध आवारात महात्मा गांधी पुतळा अनावरणानंतर पुस्तक प्रकाशन कार्यक्रम झाला. 1924 मधील काँग्रेस अधिवेशनातील निर्णय, कोलकाता करार, सरोजिनी नायडू यांची विदेशातील सेवा, राष्ट्रीय शिक्षण संस्था, बर्मा देशातील जनतेला सहानुभूती, कोहत व गुलबर्गा येथील दंगली, अस्पृश्यता निवारण आदी ऐतिहासिक माहिती व छायाचित्रे पुस्तकांमध्ये समाविष्ट आहेत. पुस्तक प्रकाशनप्रसंगी विधानसभेचे सभापती बसवराज होरट्टी, विधानसभेचे अध्यक्ष यु. टी. खादर, उपमुख्यमंत्री डी. के. शिवकुमार, खासदार प्रियांका गांधी, के. सी. वेणुगोपाल, रणदीपसिंग सूरजेवाला, विधानसभा उपाध्यक्ष रुद्रप्पा लमाणी, मंत्री एच. के. पाटील, डॉ. जी. परमेश्वर, सतीश जारकीहोळी उपस्थित होते.