नक्षलवाद्यांकडून आयईडी स्फोट, दोन जवान जखमी

बिजापूर : छत्तीसगडच्या बिजापूर जिल्ह्यात नक्षलवाद्यांनी पेरलेल्या आयईडीच्या स्फोटात सापडल्याने सुरक्षा दलांचे दोन जवान जखमी झाले. जखमींना उपचारासाठी बिजापूर येथील रुग्णालयात हलविले आहे. जखमी जवानांची नावे मृदुल बर्मन व मोहम्मद इसहाक अशी आहेत.  दोन्ही जवान कोब्रा युनिटशी संबधित आहेत. बिजापूर जिल्ह्याच्या बासागुडा पोलीस स्थानकाच्या पुतकेल शिबिरातून सीआरपीएफ आणि कोब्राचे संयुक्त पथक गस्त घालण्यासाठी बाहेर पडले होते. याचदरम्यान नक्षलवाद्यांनी पेरलेल्या आयईडीचा स्फोट होत दोन जवान जखमी झाले. दोन्ही जवानांची प्रकृती धोक्याबाहेर असल्याचे सांगण्यात आले आहे. तर यापूर्वी 12 जानेवारी रोजी जांगला पोलीस स्थानकाच्या हद्दीतील जैगुर नजीक नक्षलवाद्यांकडून आयईडी स्फोट घडविण्यात आला होता, या स्फोटात डीआरजीचे दोन जवान रामसाय मज्जि आणि गजेंद्र साह जखमी झाले होते. त्यांना उपचारासाठी रायपूर येथे हलविण्यात आले आहे.