सिव्हिल हॉस्पिटलमधील खेळण्याच्या साहित्य दुरुस्तीची मागणी

बेळगाव : सिव्हिल हॉस्पिटलमध्ये येणाऱ्या बाह्या रुग्णांसाठी सुरू करण्यात आलेल्या ओपीडी आवारात लहान मुलांसाठी गार्डन तयार करण्यात आली आहे. त्यामध्ये मुलांना खेळण्यासाठी पाळणा व इतर साहित्य ठेवण्यात आले आहे. मात्र, ते साहित्य नादुरुस्त झाले असल्याने त्याची दुरुस्ती करण्यात यावी, अशी मागणी केली जात आहे. सिव्हिल हॉस्पिटलमध्ये दररोज मोठ्या संख्येने रुग्ण उपचारासाठी येत असतात. त्यामुळे रुग्ण व नातेवाईकांना बसण्यासाठी ठिकठिकाणी खुर्च्या व बाकडे ठेवण्यात आली आहेत. ओपीडी काऊंटर आवारात ओपीडी कागद करण्यासह अॅडमिशन आणि बिल काऊंटर देखील आहेत. त्यामुळे दररोज या ठिकाणी मोठी गर्दी असते. रुग्णालयात येणारे रुग्ण व नातेवाईक लहान मुलांना सोबत घेऊन येत असतात. मुलांच्या बसण्याची व खेळण्याची सोय व्हावी, यासाठी हॉस्पिटलच्यावतीने ओपीडी आवारात लहानसे गार्डन तयार करण्यात आले आहे. मुलांना खेळण्या-बागडण्यासाठी पाळणा, त्याचबरोबर इतर साहित्य ठेवण्यात आले आहे. पण त्याच्या देखभालीकडे दुर्लक्ष झाले असल्याने साहित्य नादुरुस्त बनले आहे. त्यामुळे मुलांची गैरसोय होत असून याकडे बिम्स प्रशासनाने लक्ष देऊन साहित्याची दुरुस्ती करावी, अशी मागणी केली जात आहे.