लेकव्ह्यू हॉस्पिटल वळणावर वाहन अपघातात वाढ

बेळगाव : सम्राट अशोक सर्कलकडून सांबऱ्याकडे जाणाऱ्या रोडवर बॅरिकेड्स लावून वाहतूक पोलिसांनी रस्ता बंद केला आहे. त्यामुळे सांबऱ्याकडे जाणाऱ्या वाहन चालकांना लेकव्ह्यू हॉस्पिटल समोरून वळण घेऊन पुढे जावे लागत आहे. परिणामी या ठिकाणी वाहतूक केंडी होत असून, दररोज लहान-मोठे अपघातही घडत आहे. सोमवार दि. 6 रोजी एक वृद्धा अपघातात जखमी झाल्याने तिला रुग्णालयात दाखल करण्यात आले. गेल्या काही वर्षापासून बेळगाव शहर आणि उपनगरात वाहतूकीची समस्या गंभीर बनली आहे. जिकडेतिकडे वाहतूक कोंडी होत असून, वाहनचालकांना तासनतास कोंडीमध्ये अडकून पडावे लागत आहे. वाहतूक व्यवस्था सुरळीत करण्यासाठी पोलिसांकडून प्रयत्न होणे गरजेचे आहे. मात्र पोलीस केवळ दंडात्मक कारवाई करण्यातच व्यस्त असल्याचे दिसून येत आहे. जिकडेतिकडे वाहतूक कोंडी होत असल्याने वाहनचालक हैराण झाले आहेत. शहरातील काही प्रमुख रस्त्यांवरील वळणावर पोलिसांनी बॅरिकेडस लावले आहेत. त्यामुळे वाहनचालकांना लांबचा पल्ला गाठून ये-जा करण्याची वेळ आली आहे. अशाच प्रकारे लेकव्ह्यू हॉस्पिटल क्रॉसवर वळण घेताना वाहनांचे लहान-मोठे अपघात घडत आहे. त्यामुळे त्या ठिकाणी कायमस्वरूपी वाहतुक पोलिसांची नियुक्ती करावी अशी मागणी केली जात आहे.