बेळगाव : सिग्नेचर स्पोर्ट्स क्लब आयोजीत साईराज लॉन पुरस्कृत नरेद्र कुलकर्णी स्मृती चषक टी-20 क्रिकेट स्पर्धेत उद्घाटन दिवशी साईराज वॉरियर्स संघाने एमसीसीचा 6 गड्यांनी तर सिग्नीचर स्पोर्ट्स क्लबने युनायटेड सीसीचा 8 गड्यांनी पराभव करुन विजयी सलामी दिली. योदेश जाधव, अवधूत हणमसेठ यांना ‘सामनावीर’ पुरस्कार देण्यात आले. प्रमुख पाहुणे रोहित फगेरे, स्वप्नील पुजारी, गजानन जैनोजी, अमरदीप पाटील, रामकृष्णा सिद्दलिंग,नागेश सुतार आदी मान्यवर उपस्थित होते. मान्यवरांच्या हस्ते यष्टीचे पूजन करुन स्पर्धेचे उद्घाटन करण्यात आले. पहिल्या सामन्यात युनायटेड संघाने प्रथम फलंदाजी करताना 20 षटकात 9 गडी बाद 136 धावा केल्या.
त्यात पिंक इनामदारने 4 षटकार 4 चौकारांसह 54, अक्रम पिरजादेने 1 षटकार, 4 चौकारांसह 36 तर तौसिफने 24 धावा केल्या. सिग्नीचरतर्फे भरत व अमोल यांनी प्रत्येकी 2 गडी बाद केले. प्रत्युत्तरादाखल खेळताना सिग्नीचर स्पोर्ट्सने 11.4 षटकात 2 गडी बाद 142 धावा करुन सामना 8 गड्यांनी जिंकला. त्यात संतोषने 3 षटकार, 6 चौकारांसह 55, योगेशने 1 षटकार 4 चौकारांसह 46 तर रोहीतने 23 धावा केल्या. युनायटेडतर्फे शहाबाजने 2 गडी बाद केले. दुसऱ्या सामन्यात एमसीसीने प्रथम फलंदाजी करताना 20 षटकात सर्वगडी बाद 93 धावा केल्या. त्यात मलिक मुल्लाने 34, आनंद चव्हाणने 18 धावा केल्या. साईराजतर्फे अवधूत हणमसेठने 3, रोशन व आकाश यांनी प्रत्येकी 2 गडी बाद केले. प्रत्युत्तरादाखल खेळताना साईराज वारियर्सने 11.2 षटकात 4 गडी बाद 94 धावा करुन सामना 6 गड्यांनी जिंकला. त्यात संतोषने 1 षटकार 3 चौकारांसह नाबाद 29, तर कल्पेशने 25 धावा केल्या. एमसीसीतर्फे गौसपिरहाजीने 2 गडी बाद केले.
