आमदाराकडे खंडणी मागितली 5 कोटींची, उकळले 5 लाख : ओडिशातील आरोपीच्या गोवा पोलिसांनी आवळल्या मुसक्या
पणजी : भाजप सरकारातील गोव्यातील विद्यमान आमदाराला त्याचा एका महिलेसोबतचा अश्लील व्हिडियो व्हायरल करू, अशी धमकी आल्यानंतर या घटनेने राज्यात हा गोव्याचा आमदार कोण याबाबतच्या चर्चेला उधाण आले आहे. 5 कोटी ऊपये द्या, अन्यथा महिलेबरोबरचा अश्लील व्हिडिओ सोशल मीडियावर अपलोड करून बदनाम करू, अशी धमकी खंडणीबहाद्दराने त्या आमदाराला दिली आहे. संबंधित आमदाराने या धमकीप्रकरणी गुन्हा अन्वेषण शाखेत रितसर तक्रार दाखल केली होती. तक्रारीनंतर आमदाराला धमकी देणाऱ्या कुकेश राउटा (25, ओडिशा) या संशयिताला गुजरातमधून अटक करण्यात आली आहे. आमदाराला धमकी दिलेल्या संशयिताने आतापर्यंत पाच लाख ऊपयांची खंडणी उकळली असल्याचेही पोलिसांनी सांगितले.
संशयित कुकेश याने 5 डिसेंबर 2023 रोजी आमदाराला व्हिडिओ कॉल करून संपर्क साधला होता. त्यावेळी संशयिताने आमदाराचा व्हिडिओ कॉल रेकॉर्ड करून घेतला होता. नंतर या आमदाराचा महिलेबरोबर अश्लील व्हिडिओ तयार केला. तो व्हिडिओ आमदाराच्या मोबाईलवर पाठवून सोशल मीडियावर अपलोड करून बदनाम करण्याची धमकी दिली होती. संशयिताने आमदाराकडून प्रथम 55 हजार ऊपये घेतले. त्यानंतर संशयिताने धमकी देत आमदाराकडे 5 कोटीची खंडणी मागितल्याचे तक्रारीत नमूद करण्यात आले. याची दखल घेऊन गुन्हा शाखेचे निरीक्षक निनाद देऊलकर यांनी 2 डिसेंबर रोजी कुकेश राउता या युवकाविरोधात भारतीय दंड संहितेच्या कलम 384 आणि माहिती व तंत्रज्ञान कायद्याचे कलम 66सी, 67 व 67 ए अंतर्गत गुन्हा दाखल करून तपास सुरू केला.
दरम्यान संशयित गुजरात येथील अहमदाबाद येथे असल्याचे समोर आले. त्यानुसार, अधीक्षक राहुल गुप्ता आणि उपअधीक्षक राजेश कुमार याच्या मार्गदर्शनाखाली निरीक्षक किशोर रामानन आणि काँन्स्टेबल सैफुला मकंदर यांचे पथक मंगळवारी पहाटे तेथे रवाना करण्यात आले होते. हे पथक त्या ठिकाणी गेल्यानंतर पथकाने संशयिताच्या मुसक्या आवळल्या. त्यानंतर बुधवारी संशयित युवकाला गोव्यात आणून अटक केली. या युवकाची प्राथमिक चौकशी केली असता, त्याने अनेकदा धमकी देत आमदाराकडून आतापर्यंत पाच लाख ऊपये खंडणी उकळल्याची माहिती संशयिताने पोलिसांना दिली. संशयित हा उच्च शिक्षत असून, तो विज्ञान शाखेचा पदव्युत्तर आहे. हा संशयित कुंडईतील एका प्रसिद्ध फार्मास्युटिकल कंपनीत काम करीत असल्याचीही माहिती पोलिसांना प्राप्त झाली आहे. या प्रकरणात आणखी कोणी गुंतले आहेत का, त्या दिशनेही पोलिसांनी तपास सुरू केला आहे.
