प्लास्टिक-परवाना नसलेल्या व्यावसायिकांविरोधात कारवाई

बेळगाव : महानगरपालिकेने प्लास्टिक व विनापरवाना चालविणाऱ्या व्यावसायांविरोधात पुन्हा कारवाईचा बडगा उचलला असून महांतेशनगर परिसरात शनिवारी अनेक दुकानदारांवर दंडात्मक कारवाई करण्यात आली आहे. याचबरोबर अस्वच्छता असलेल्या हॉटेल्स तसेच कँटिन चालकांवरही दंडात्मक कारवाई करण्यात आली. यामुळे व्यावसायिकांमध्ये खळबळ उडाली आहे. प्लास्टिक वापरावर निर्बंध घालण्यासाठी अनेकवेळा प्रयत्न करण्यात आले. तरीदेखील अनेकजण प्लास्टिकच्या पिशव्या तसेच इतर साहित्य विक्री करत आहेत. अनेकांनी परवाना न घेताच व्यवसाय सुरु केला आहे. त्यामुळे त्यांच्याकडूनही दंड वसूल करण्यात आला. महांतेशनगर परिसरात 7 हजार रुपये दंड वसूल केला आहे. मनपा आयुक्त अशोक दुंडगुटी यांच्या मार्गदर्शनाखाली ही कारवाई करण्यात आली. आरोग्याधिकारी डॉ. संजू नांद्रे, पर्यावरण विभागाचे अभियंते अदिलखान पठाण, अनंत पाटील यांच्यासह मनपा कर्मचाऱ्यांनी ही कारवाई केली.