बार असोसिएशन नूतन पदाधिकाऱ्यांना प्रमाणपत्र वितरण

बेळगाव : बेळगाव बार असोसिएशनची निवडणूक मोठ्या चुरशीने पार पडली. यामध्ये अध्यक्षपदी अॅड. एस. एस. किवडसण्णावर, उपाध्यक्ष अॅड. बसवराज एम. मुगळी, उपाध्यक्ष अॅड. विजय पाटील, उपाध्यक्ष अॅड. शीतल रामशेट्टी, जनरल सेक्रेटरी अॅड. वाय. के. दिवटे, जॉईंट सेक्रेटरी अॅड. विश्वनाथ बसवराज सुलतानपुरी यांच्यासह पाच कमिटी सदस्य आणि महिला प्रतिनिधींची निवड झाली. त्यांना शुक्रवारी निवडणूक अधिकारी अॅड. आर. बी. मिरजकर यांनी प्रमाणपत्र दिले. प्रारंभी नूतन सदस्यांचा सत्कार करण्यात आला. त्यानंतर स्मृतिचिन्ह देऊन प्रमाणपत्र देण्यात आले. निवडणूक अधिकारी मिरजकर यांनी पुढील कार्यासाठी शुभेच्छा दिल्या. यावेळी नूतन अध्यक्ष अॅड. एस. एस. किवडसण्णावर म्हणाले, सर्वांना विश्वासात घेऊनच मी काम करीन. वकिलांच्या समस्या सोडविण्यासाठी नेहमीच प्रयत्नशील राहीन, असे आश्वासनही त्यांनी दिले. निवडणूक प्रक्रिया उत्तमप्रकारे राबविल्याबद्दल त्यांनी निवडणूक अधिकाऱ्यांबरोबरच त्यांच्या साहाय्यकांचे आभार यावेळी मानले. बार असोसिएशनच्या निवडणुकीवेळी काम केलेल्या सर्व साहाय्यक वकिलांचाही यावेळी सन्मान करण्यात आला. साहाय्यक निवडणूक अधिकारी अॅड. सुधीर सकरी, अॅड. अमृत कोल्हटकर, अॅड. गजानन जाधव यांच्यासह इतर वकिलांचाही सत्कार करण्यात आला.