अयोध्या येथून आलेल्या अक्षता कलशाची अनगोळात मिरवणूक

बेळगाव : अयोध्या येथून श्रीराम मंदिराच्या अक्षता अनगोळमध्ये कलशातून आल्या आहेत. हरिमंदिर येथे पूजा, अर्चा करून मिरवणुकीला प्रारंभ झाला. त्यानंतर सवाद्य अनगोळ मुख्य रस्ता, धर्मवीर संभाजी चौक, रघुनाथ पेठ, जय महाराष्ट्र चौक, गांधी स्मारक, लक्ष्मी गल्ली, मारुती गल्ली, मारुती मंदिर येथे या मिरवणुकीची सांगता झाली. मारुती मंदिरामध्ये अक्षता कलश ठेवण्यात आला. महापौर शौभा सोमणाचे यांच्या हस्ते पूजा करून मिरवणूक काढण्यात आली. मारुती मंदिरमधून उपकलश तयार करून अक्षता विविध ठिकाणी पाठविण्यात येणार आहेत. प्रत्येकाच्या घरी अक्षता पोहोचवून अयोध्या येथील श्रीराम मंदिराच्या उद्घाटनाच्या कार्यक्रमाला आमंत्रण दिले जाणार आहे. 22 जानेवारी रोजी हा कार्यक्रम होणार आहे. ज्यांना शक्य आहे त्यांनी त्या तारखेला दाखल व्हावे. सध्या देण्यात आलेल्या अक्षता आपल्या घरी ठेवून ज्या वेळेला अयोध्येला आपणाला जाणे शक्य आहे त्यावेळी या अक्षता घेऊन त्या ठिकाणी समर्पित कराव्यात, असे सांगण्यात आले. यावेळी नगरसेवक वाणी जोशी, श्रीशैल कांबळे, विनायक धाकलुचे यांच्यासह भक्त मोठ्या संख्येने उपस्थित होते. मिरवणुकीमध्ये भाविकांनी मोठ्या उत्साहाने भाग घेतला होता.