गरजू शालेय विद्यार्थ्यांना लोककल्प फाऊंडेशनचा आधार

बेळगाव : लोकमान्य मल्टीपर्पज को-ऑप. सोसायटीचे संस्थापक किरण ठाकुर हे नेहमीच सामाजिक क्षेत्रात मोलाची कामगिरी करत असतात. लोकमान्य सोसायटीने नेहमीच सामाजिक बांधिलकी जपली आहे व 213 शाखांच्या विस्तीर्ण माध्यमातून समाजकार्य राबवत आहे. लोककल्प फाऊंडेशनची स्थापना ही समाजातील गरजू व्यक्तींना जीवनावश्यक वस्तू मिळवून देणे याच उद्देशाने करण्यात आली. याच लोककल्प फाऊंडेशनचे कार्य आता महाराष्ट्रातही राबविण्यात येत आहे. लोककल्प फाऊंडेशन, मुंबई विभागातर्फे जिल्हा परिषद शाळा गवतेपाडा, ता. वाडा, जि. पालघर येथील गरजू विद्यार्थ्यांना थंडीपासून बचाव व्हावा यासाठी ‘जेथे गरज तेथे मदत’ हे ध्येय मानून चालणाऱ्या लोककल्प फाऊंडेशनतर्फे स्वेटर्सचे वाटप नुकतेच करण्यात आले. या उपयुक्त अशा भेटीमुळे विद्यार्थी, पालक व शिक्षकांच्या चेहऱ्यावर समाधान दिसून येत होते. स्वेटर देऊन मुलांना आनंद दिल्याबद्दल मुख्याध्यापक सचिन शिंदे आणि ग्रामस्थांनी लोककल्पचे आभार मानले. यावेळी मुंबई विभागाचे असिस्टंट रिजनल मॅनेजर अतुल परब, सिनियर मॅनेजर स्वप्नील चिखलकर, मार्केटिंग मॅनेजर सतीश सोनार व ग्रामस्थ उपस्थित होते. अतुल परब यांनी लोकमान्य संस्थेच्या वाटचालीची आणि ध्येयाची तसेच लोककल्पच्या कार्याची माहिती देऊन मार्गदर्शन केले.