मडगांव : गोव्याच्या पाच बॉक्सिंगपटूंनी राष्ट्रीय क्रीडा स्पर्धेच्या बॉक्सिंग क्रीडा प्रकारात उपान्त्य फेरीत प्रवेश मिळविला. या स्पर्धेचे आयोजन पेडे इनडोअर संकुलातील बॉक्सिंग बाऊट्समध्ये करण्यात आले आहे. एलीट पुरूषांच्या 86 ते 92 किलो वजनीगटात गोव्याच्या आयुष साईने उपान्त्य फेरीत जाताना दिल्लीच्या हर्ष राणाचा पराभव केला. एलीट 92 किलोवरील वजनीगटात गोव्याच्या गौरव चौहानने हरियाणाच्या सुमीत रांगीचा पराभव केला. 75 ते 80 किलो वजनीगटात गोव्याच्या लोकेशने उपान्त्य फेरी गाठताना पंजाबच्या अर्शप्रीत सिंगला पराभूत केले. महिलांच्या 57 ते 60 किलो वजनीगटात गोव्याच्या निहारिकाने उपान्त्य फेरीत जाताना केरळच्या ग्रीटा साजी हिला 5-0 असे नमविले. महिलांच्या 70 ते 75 किलो वजनीगटात गोव्याच्या सानामाचा चानू हिने जिज्ञासा राजपूतला हरविले व उपान्त्य फेरीत प्रवेश मिळविला. गोव्याच्या श्रीशा जांपुला हिला 63 ते 66 किलो वजनीगटात पराभव स्वीकारावा लागला. तिला पंजाबच्या कोमलप्रीत कौरने पराभूत केले. पुरूषांच्या 54 ते 57 किलो वजनीगटात प्रल्हाद पांडाला उपान्त्य फेरी गाठण्यात अपयश आले. त्याचा महाराष्ट्राच्या ऋषिकेश गौड याने 4-1 असा पराभव केला.
Tarun Bharat Portal
Amit Kulkarni a versatile content writer, scriptwriter, and content producer at Tarun Bharat Media. Specializes in sports news, local news entertainment, national news and astrology content. His captivating storytelling and deep industry knowledge make him an expert in crafting engaging narratives.
Related Posts
