अतिथी भोगणला मालिकावीर तर विश्रृत कुंदरनाड याला सामनावीर पुरस्कार
बेळगाव : युनियन जिमखाना आयोजित विश्रृत चीट्स प्रायव्हेट लिमिटेड पुरस्कृत युनियन जिमखाना संघाने बेंगलोरच्या क्रिक लाईफ क्रिकेट अकादमीचा 3 सामन्यांच्या मालिकेत 3-0 असा विजय मिळवत मालिकेत क्लीन स्वीप करत अजिंक्यपद पटकावले. युनियन जिमखाना मैदानावर शेवटच्या थरारक सामन्यात युनियन जिमखाना संघाने क्रिक लाईफ अकादमीचा 5 गड्यांनी पराभव केला. क्रिक लाईफ अकादमी संघाने नाणेफेक जिंकून प्रथम फलंदाजी करताना 50 षटकात सर्वबाद 197 धावा केल्या. त्यामध्ये कर्णधार माहीन श्रीकांत 6 चौकारांसह 83, धनिक कुमारने 40, प्रवीण कुमारने 17 धावा केल्या. युनियन जिमखानातर्फे अतिथी भोगणने 4, फरहान शेख व विश्रृत कुंदरनाड यांनी प्रत्येकी 2 गडी बाद केले.
प्रत्युत्तरादाखल खेळताना युनियन जिमखाना संघाने 48 षटकात 5 गडी बाद 198 धावा करून सामना व मालिका जिंकली. त्यात विश्रृत कुंदरनाडने 5 चौकारांसह 46, अर्जुन येळ्ळूरकरने 4 चौकारांसह 37, मोहम्मद अब्बासने 33, मोहम्मद हमजाने 28 धावा केल्या. क्रिक लाईफ संघातर्फे अश्विनकुमारने 3 तर माहीन श्रीकांतने एक गडी बाद केला. प्रमुख पाहुणे जिमखाना सचिव प्रसन्ना सुंठणकर, संचालक रोहित पोरवाल, चंदन कुंदरनाड, बेंगळूर संघाचे प्रशिक्षक श्रीकांत तसेच मोहम्मद ताहीर सराफ यांच्या हस्ते विजेत्या व उपविजेता संघांना चषक देऊन गौरविण्यात आले. सामनावीर विश्रृत कुंदरनाड, मालिकावीर अतिथी भोगण, इम्पॅक्ट खेळाडू मोहम्मद अब्बास, उत्कृष्ट फलंदाज माहीन श्रीकांत, उत्कृष्ट गोलंदाज अश्विन कुमार, प्रॉमिसिंग खेळाडू अनिल तेंडुलकर व मोहम्मद हमजा यांना चषक देऊन गौरविण्यात आले. यावेळी मिलिंद चव्हाण, सुजित शिंदोळकर, समीर किल्लेदार आदी उपस्थित होते.
