साई धारवाड संघावर एकतर्फी मात
बेळगाव : कित्तूर येथे युवजन क्रीडा खाते, युवा सबलीकरण आयोजित कित्तूर चन्नम्मा उत्सवानिमित्त आयोजित केलेल्या व्हॉलीबॉल स्पर्धेच्या अंतिम सामन्यात बेळगावच्या डीवायईएस संघाने साई धारवाड संघाचा 2-0 अशा गुण फरकाने पराभव करून तर महिलांच्या विभागात विजापूर संघाने बायहट्टी संघाचा पराभव करून विजेतेपद पटकाविले. कित्तूर येथे सरकारी शाळेच्या मैदानावर या स्पर्धेचे आयोजन केले होते. या स्पर्धेत पुरुष गटात 24 संघांनी तर महिला गटात 16 संघांनी भाग घेतला होता. पुरुष विभागात धारवाड, शिरसी, गदग, विजापूर, बेळगावसह स्थानिक संघांनी भाग घेतला होता. महिलांच्या गटात घेण्यात आलेल्या पहिल्या उपांत्य फेरीच्या सामन्यात विजापूर संघाने डीवाईएस बेळगाव संघाचा 21-18, 18-21, 15-10 अशा सेटमध्ये तर दुसऱ्या उपांत्य सामन्यात बायहट्टी संघाने धारवाड संघाचा 21-15, 21-17 अशा गुण फरकाने पराभव करून अंतिम फेरीत प्रवेश केला. अंतिम सामन्यात विजापूर संघाने बायहट्टी संघाचा 26-24, 25-21 अशा सरळ सेटमध्ये पराभव करून विजेतेपद पटकाविले. तिसऱ्या क्रमांकासाठी खेळविलेल्या सामन्यात धारवाड संघाने डीवायईएस बेळगाव संघाचा 15-13, 12-15, 15-13 अशा सेटमध्ये पराभव करून तिसरा क्रमांक पटकाविला.
पुरुष गटात डीवायईएस संघाने एम. के. हुबळी संघाचा 25-13, 25-18 तर दुसऱ्या उपांत्य सामन्यात साई धारवाडने एस. एस. सिद्धरामेश्वर पीयू कॉलेज संघाचा 25-14, 25-18 अशा सेटमध्ये पराभव करून अंतिम फेरीत प्रवेश केला. अंतिम सामन्यात डीवाईएस बेळगाव संघाने साई धारवाडचा 25-22, 25-23 अशा सरळ सेटमध्ये पराभव करून विजेतेपद पटकाविले. तिसऱ्या क्रमांकासाठी खेळविलेल्या सामन्यात एम. के. हुबळीने एस. एस. पीयू संघाचा 2-0 असा पराभव केला. सामन्यानंतर युवजन क्रीडा अधिकारी बी. श्रीनिवास, बसवराज होसमट्टी, व्ही. एस. पाटील, संजू नाईक आदींच्या हस्ते विजेत्या व उपविजेत्या संघांना गौरविण्यात आले. पंच म्हणून प्रकाश गुंडण्णावर, हर्षवर्धन शिंगाडे, शंकर कोलकार, बी. एस. भरमण्णावर, राजू चौगुले, उमेश मजुकर, एस. ए. पेंढारी, भरत अक्षीमनी, वाय. बी. संपगाव, जी. एन. पाटील यांनी काम पाहिले.
