दसरोत्सवात देवतांना सोन्या-चांदीच्या दागिन्यांचा साज चढवण्याची प्रथा
ओटवणे प्रतिनिधी
सुमारे साडे चारशे वर्षांची गौरवशाली ऐतिहासिक परंपरा लाभलेल्या ओटवणे गावचा प्रसिध्द शाही दसरोत्सव सोमवारी २३ व २४ ऑक्टोबरला होत आहे. या दसरोत्सवात वर्षातून एकदाच दर्शन होणाऱ्या सुवर्ण तरंगाच्या दर्शनासाठी जिल्ह्यासह गोवा, बेळगाव कोल्हापूर परिसरातून भाविकांची अलोट गर्दी होते.
ओटवणे गावचा संस्थानकालीन दसराउत्सव खंडेनवमी आणि विजयादशमी असा दोन दिवस साजरा केला जातो. दसरोत्सवात या देवस्थानच्या देवतांना भरजरी वस्त्रांसह सोन्या-चांदीच्या दागिन्यांचा साज चढवण्याची प्रथा आहे. या देवस्थानची तिन्ही तरंगे सोन्याची आहेत. सावंतवाडी महसूल खात्याच्या उपकोषागारात असलेला हा ऐतिहासिक सोनेरी ठेवा खंडेनवमीला सोमवारी सकाळी मंदिरात आणला जाणार आहे.
दुपारी रवळनाथासह या देवस्थानच्या देवतांना भरजरी वस्त्रांसह सुवर्ण अलंकारांनी सजविल्यानंतर तिन्ही तरंगाना सप्त पितांबरीच्या वस्त्रांनी सजविण्यात येणार आहे. सायंकाळी सुवर्ण तरंगासह सवाद्य पालखी प्रदक्षिणा घातल्यानंतर शिव लग्न सोहळा त्यानंतर भाविकांनी सोने म्हणून आपट्याची लुटल्यानंतर तिन्ही तरंग देवतांच्या साक्षीने महिलानी क्लेशपीडा परिहार्थ अग्नि स्नान होणार आहे. मंगळवारी सायंकाळी सुवर्ण तरंगाची खेम सावंत समाधी भेट व गाव रखवाल कौलाने या दोन दिवसांच्या दासरोत्सवाची सांगता होणार आहे.
