हिंडाल्को येथे मियावाकी वृक्षारोपण प्रकल्पाचे उद्घाटन

बेळगाव : रोटरी क्लब ऑफ बेळगाव दक्षिणतर्फे हिंडाल्कोच्या मदतीने ‘मियावाकी’ जंगल वाढविण्यात येत आहे. या जंगलाचे उद्दिष्ट स्थानिक किंवा पारंपरिक झाडे लावून ती वाढविणे आहे. दहापट वेगाने वाढणारी, तीसपट घनता वाढविणारी आणि शंभरपट अधिक जैवविविधता असलेली एक स्वयंशाश्वत परिसंस्था निर्माण करण्याची क्षमता यामध्ये आहे. मियावाकी जंगलामध्ये पारंपरिक पद्धतीने वाढलेल्या जंगलाच्या तुलनेत 30 पटीने जास्त पाणी साठवून ठेवण्याचे व कर्बवायू शोषण्याची क्षमता आहे. यासाठी हिंडाल्को कंपनीने रोटरी क्लब दक्षिणला एक एकरहून अधिक जमीन दिली असून झाडांचे संगोपन करण्याचेही आश्वासन देण्यात आले आहे. मियावाकी वन वृक्षारोपण प्रकल्पाचे उद्घाटन हिंडाल्को येथे कर्नाटक राज्य प्रदूषण नियंत्रण मंडळाचे अध्यक्ष डॉ. शांत ए. थिमय्या यांच्या हस्ते करण्यात आले. याप्रसंगी उपाध्यक्ष अभिजित बंदी, एचआर मयुरकृष्ण, पर्यावरण विभागप्रमुख संतोष यल्लापूरकर, रोटरी क्लब दक्षिणचे अध्यक्ष विजय दरगशेट्टी, सचिव हेमंत कामत, विरेन कलघटगी, डॉ. गोविंद मिसाळे यांच्यासह अनेक रोटेरियन उपस्थित होते.