संजय लीला भन्साळी यांचा चित्रपट
दाक्षिणात्य अभिनेत्री नयनताराच्या लोकप्रियतेत मोठी वाढ झाली आहे. जवान चित्रपटातील तिचा अभिनय पाहून तिच्या चाहत्यांच्या संख्येत मोठी भर पडली आहे. आता हिंदीभाषिक पट्ट्यातही तिचा मोठा चाहतावर्ग निर्माण झाला आहे. नयनतारा आता लवकरच संजय लीला भन्साळी यांचा आगामी चित्रपट ‘बैजू बावरा’मध्ये दिसून येऊ शकते.
नयनताराशी संजय लीला भन्साळी यांच्या प्रॉडक्शन हाउसने संपर्क साधल्याचे समजते. परंतु नयनताराने अद्याप या चित्रपटासाठी होकार दर्शविलेला नाही. नयनतारा आणि भन्साळी यांच्याकडून यासंबंधी बोलणी प्राथमिक स्तरावर सुरू असून याला लवकरच अंतिम स्वरुप दिले जाऊ शकते.
मार्च महिन्यात नयनतारा आणि तिचा पती विग्नेश शिवन हे संजय लीला भन्साळी यांच्या कार्यालयात पोहाचले होते. तेव्हापासून नयनतारा ही भन्साळी यांच्या चित्रपटात काम करणार असल्याचे मानले जात आहे. ‘बैजू बावरा’ हा चित्रपट पुढील वर्षी प्रदर्शित होऊ शकतो. या चित्रपटात रणवीर सिंह नायकाच्या भूमिकेत असणार आहे. तर आलिया भट्ट देखील यात संधी मिळणार असल्याचे मानले जात आहे.
नयनतारा सध्या स्वत:च्या 75 व्या चित्रपटाचे चित्रिकरण करत आहे. तिच्याकडे ‘टेस्ट’ तमिळ चित्रपट देखली आहे. तर भन्साळी हे ‘हीरामंडी’द्वारे वेबसीरिजच्या जगतात पाऊल ठेवणार आहेत. ही सीरिज नेटफ्लिक्सवर प्रदर्शित होणार असून यात सोनाक्षी सिन्हा, अदिति राव हैदरी आणि मनीषा कोईराला समवेत अनेक अभिनेत्री दिसून येणार आहेत.
