दोन गोलंदाज वर्ल्डकपमधून बाहेर
वृत्तसंस्था /जोहान्सबर्ग
आयसीसी वनडे विश्वचषक सुरु होण्यापूर्वी दुखापतग्रस्त खेळाडूंचा या मेगा स्पर्धेतून बाहेर होण्याचा ट्रेंड कायम आहे. विश्वचषकापूर्वी दक्षिण आफ्रिकेच्या संघाला दुहेरी धक्का बसला आहे. वेगवान गोलंदाज एन्रिच नॉर्त्जेनंतर आता गुडघ्याच्या दुखापतीमुळे सिसांदा मगालादेखील विश्वचषक संघातून बाहेर बाहेर पडला आहे. ऑस्ट्रेलियाविरुद्ध घरच्या वनडे मालिकेतील दुसऱ्या सामन्यात गोलंदाजी करताना एनरिक नॉर्त्जेला पाठीचा त्रास झाला. या सामन्यात तो 5 षटके टाकून ड्रेसिंग रूममध्ये परतला. विश्वचषकापूर्वी तो तंदुरुस्त होईल, असा विश्वास आफ्रिकन संघाला होता पण पाठीच्या समस्येमुळे तो आता बाहेर गेला आहे. गुडघ्याच्या दुखापतीमुळे सिसांदा मगालादेखील वर्ल्डकपमध्ये सहभागी होऊ शकणार नाही. सिसांदा मगालाने आतापर्यंत दक्षिण आफ्रिकेच्या संघासाठी 8 एकदिवसीय सामने खेळले आहेत आणि यामध्ये त्याने 14 विकेट्स घेतल्या आहेत. आता या दोन खेळाडूंच्या बदली खेळाडूंची नावे जाहीर करण्यासाठी आफ्रिकन संघाकडे 28 सप्टेंबरपर्यंत वेळ आहे. विश्वचषकातील दक्षिण आफ्रिकेचा पहिला सामना 7 ऑक्टोबर रोजी दिल्लीच्या मैदानावर श्रीलंकेविरुद्ध होणार आहे. याआधी संघाला 2 सराव सामने खेळण्याची देखील संधी मिळेल. आफ्रिकेचा पहिला सराव सामना 29 ऑक्टोबरला अफगाणिस्तान संघासोबत आणि दुसरा 2 ऑक्टोबरला न्यूझीलंडविरुद्ध होईल.
