मलप्रभा पाणीपुरवठा समितीची आज बैठक

बेळगाव : मलप्रभा जलाशयातून (नविलतीर्थ जलाशय) कालव्यात पाणी सोडण्यासंबंधी चर्चा करण्यासाठी बुधवार दि. 20 सप्टेंबर रोजी मलप्रभा पाणीपुरवठा सल्लागार समितीची तातडीची बैठक बोलावण्यात आली आहे. सदर बैठक बेळगाव जिल्हाधिकारी कार्यालयात दुपारी 3 वाजता होणार आहे. मलप्रभा पाणीपुरवठा सल्ला समितीची बैठक 27 सप्टेंबर रोजी आयोजित करण्यात आली होती. मात्र, ही बैठक तातडीने घेण्याची सूचना प्राप्त झाल्याने बुधवारी दुपारी बोलावण्यात आली आहे. यासंबंधीचे पत्रक मलप्रभा योजना पाणीपुरवठा सल्लागार समितीचे सदस्यीय सचिव आणि कर्नाटक पाणीपुरवठा निगम नि. चे सुपरीटेंडींग इंजिनिअर व्ही. एस. मधुकर यांनी जारी केले आहे. सदर बैठकीला केंद्रीयमंत्री प्रल्हाद जोशी, कायदामंत्री एच. के. पाटील, सार्वजनिक बांधकाममंत्री सतीश जारकीहोळी, बागलकोट जिल्हा पालकमंत्री आर. बी. तिम्मापूर, धारवाड जिल्हा पालकमंत्री संतोष लाड तसेच बेळगाव जिल्ह्यातील आमदार तसेच सर्व विधानपरिषद सदस्यांना उपस्थित राहण्याचे निमंत्रण देण्यात आले आहे.