गायक भजन कुमारच्या भूमिकेत विक्की कौशल
विक्की कौशल आणि मानुषी छिल्लरचा चित्रपट ‘द ग्रेट इंडियन फॅमिली’चा ट्रेलर प्रदर्शित करण्यात आला आहे. विक्की कौशलचा हा चित्रपट कौटुंबिक मनोरंजन करणारा असणार आहे. ट्रेलरनुसार या चित्रपटात बलरामपूर नावाच्या शहराची पार्श्वभूमी दाखविण्यात आली आहे. यात विक्की कौशलने वेदव्यास त्रिपाठी नावाची व्यक्तिरेखा साकारली असली तरीही त्याला भजन कुमार या नावाने ओळखले जात असल्याचे दाखविण्यात आले आहे.
भजन कुमारच्या कामाच्या स्वरुपामुळे महिला अन् मुली त्याच्या पाया पडत असतात. परंतु भजन कुमार म्हणजेच वेदच्या कुटुंबीयांना कित्येक वर्षांपूर्वी ज्या मुलाला दत्तक घेत घरी आणले होते, तो हिंदू नव्हे तर जन्माने मुस्लीम होता हे कळल्यावर चित्रपटाच्या कहाणीला वेगळे वळण मिळत असल्याचे ट्रेलरमध्ये दिसून येते.
विक्की कौशलसोबत या चित्रपटात मानुषी छिल्लर, कुमुद मिश्रा, यशपाल शर्मा, मनोज पहावा, सादिया सिद्दीकी, अलका अमीन समवेत अनेक कलाकार मुख्य भूमिका साकारत आहेत. हा चित्रपट 22 सप्टेंबर रोजी चित्रपटगृहांमध्ये प्रदर्शित होणार आहे. विक्की कौशल यापूर्वी सारा अली खानसोबत जरा हटके, जरा बचके या चित्रपटात दिसून आला होता. विक्कीचा हा चित्रपट बॉक्स ऑफिसवर यशस्वी ठरला होता.
