कुडाळ – प्रतिनिधी
मुंबई गोवा महामार्गावर पिंगुळी – गुढीपूर येथे सर्व्हिस मार्गावर ज्युपिटर व हिरो डीलक्स दुचाकी यांच्यामध्ये समोरासमोर झालेल्या अपघातात तुषार सुरेश वाडेकर (24 रा आवेरे – वेंगुर्ले) गंभीर जखमी झाला. त्याच्या वर येथील ग्रामीण रुग्णालयात प्राथमिक उपचार करून अधिक उपचारासाठी त्याला बांबोळी- गोवा येथे हलविण्यात आले.तर दुसरा दुचाकीस्वार कार्तिकी पांडुरंग मिराशी (23, मूळ रा बेळगाव ,सध्या रा. पिंगुळी चिंदरकरवाडी ) याला किरकोळ दुखापत झाली. ही घटना शनिवारी दुपारी 1.15 वाजण्याच्या सुमारास घडली.
तुषार वाडेकर आपल्या ताब्यातील ज्युपिटर दुचाकी घेऊन महामार्गावरून सावंतवाडीहून कुडाळच्या दिशेने येत होता,तर कार्तिक मिराशी आपल्या ताब्यातील हिरो डीलक्स दुचाकी घेऊन कुडाळहून आपण राहत असलेल्या पिंगूळी- चिंदरकरवाडीच्या दिशेने जात होता. या दोन दुचाकी मध्ये महामार्गाच्या बाजूला ( हॉटेल अर्जुन नजीक) सर्व्हिस मार्गावर समोरासमोर जोरात धडक झाली.अपघात पाहून काही वाहनधारक थांबले. त्यांच्या मदतीने दोन्ही जखमींना 108 रुग्णवाहिकेतून येथील ग्रामीण रुग्णालयात उपचारासाठी दाखल करण्यात आले. वैद्यकीय अधिकारी प्राची तनपुरे व सहकाऱ्यांनी जखमींवर उपचार केले. तुषार याच्या डोके व तोंडाला गंभीर दुखापत झाली असल्याने त्याला अधिक उपचारासाठी बांबोळी – गोवा येथे हलविण्यात आले.दोन्ही दुचाकींचे नुकसान झाले. हवालदार ममता जाधव यांनी घटनास्थळी पंचनामा केला.
