रेल्वेत लूट झालेले तरुण मध्यप्रदेशला रवाना

बेळगाव : चॉकलेट व चिप्समधून गुंगीचे औषध देऊन रेल्वेत लुटण्यात आलेले सर्व आठ तरुण शुक्रवारी रात्री मध्यप्रदेशला रवाना झाले. पोलीस व रेल्वे विभागातील अधिकाऱ्यांनी या तरुणांची व्यवस्था केली. सोमवार दि. 11 सप्टेंबर रोजी वास्को-हजरत निजामुद्दिन एक्स्प्रेसमधून प्रवास करताना चौघा भामट्यांनी चॉकलेट व चिप्समधून गुंगीचे औषध दिले. सर्व आठ मजूर तरुणांची शुद्ध हरपताच त्यांच्या खिशातील सात मोबाईल व सुमारे 25 हजार रुपये पळविले होते. रेल्वेचे अधिकारी व रेल्वे पोलिसांनी बेळगाव रेल्वेस्थानकावर या तरुणांना खाली उतरवून शुक्रवारी रात्री उपचारासाठी त्यांना सिव्हिल हॉस्पिटलमध्ये दाखल केले होते. गुरुवारी सर्व तरुण पूर्णपणे बरे झाल्यामुळे त्यांना डिस्चार्ज देण्यात आला होता. पोलिसांनी या आठही तरुणांना पोलीस स्थानकात नेऊन एक दिवस त्यांच्याकडून या घटनेसंबंधी माहिती घेतली. शुक्रवारी सायंकाळी वास्को-हजरत निजामुद्दिन एक्स्प्रेसने हे सर्व तरुण मध्यप्रदेशला रवाना झाले. वास्कोपासून सावर्डेपर्यंत हा प्रकार घडला आहे. त्यामुळे हे संपूर्ण प्रकरण पुढील चौकशीसाठी गोवा रेल्वे पोलिसांकडे वर्ग करण्यात येणार आहे. वैद्यकीय अहवाल प्राप्त झाल्यानंतर पुढील आठवड्यात हे प्रकरण गोवा पोलिसांकडे सोपविण्यात येणार असल्याचे रेल्वे पोलिसांनी सांगितले.