ऑनलाईन टीम / तरुण भारत :
राष्ट्रवादीचे अध्यक्ष शरद पवार आणि उपमुख्यमंत्री अजित पवार यांच्यात काल उद्योगपती अतुल चोरडिया यांच्या निवासस्थानी बैठक झाली. जयंत पाटील यांच्या भावाला ईडीची नोटीस आल्याने, त्यावर मार्ग काढण्यासाठी चोरडिया यांच्या घरी ही गुप्त बैठक झाल्याची चर्चा राजकीय वर्तुळात होती. त्यावर जयंत पाटील यांनी स्पष्टीकरण दिलं आहे.
जयंत पाटील म्हणाले, माझ्या बंधुंना ईडीची नोटीस आली आहे, पण त्याचा शरद पवार आणि अजित पवार यांच्या भेटीशी संबंध नाही. या बैठकीपूर्वी मी ही चोरडिया यांच्या घरी उपस्थित होतो. पण मी तिथून निघून गेलो, त्यानंतर काय झालं हे मला माहित नाही. या भेटीचा आणि ईडी नोटीसचा काही संबंध नाही. बातम्या पेरल्या जातात असं मला वाटतंय. आता हे कोण करतंय ते तुम्हीच शोधून काढा.
माझ्या बंधुंना ईडीची नोटीस आली. एका कंपनीबाबत त्यांना माहिती विचारण्यात आली. चार दिवसांपूर्वीच ते जाऊन आले. ईडीला आवश्यक ती माहिती त्यांनी दिली होती. त्यामुळे ही गुप्त भेट नव्हती. कार्यकर्त्यांच्या मनात संभ्रम होण्याचा प्रश्न नाही. लोक एकमेकांना भेटत असतात. विशेष सांगण्याची आवश्यकता आहे, असं मला वाटत नाही, असेही त्यांनी सांगितले.
