जिल्हाधिकारी कार्यालयात उंदीर-डासांचा उपद्रव वाढल्याने मागविली होती निविदा
बेळगाव : जिल्हाधिकारी कार्यालयातील उंदीर व डास निर्मूलनासाठी जिल्हाधिकाऱ्यांकडून निविदा काढण्यात आली होती. त्यानुसार या कामासाठी तिघा जणांकडून निविदा सादर करण्यात आली आहे. उंदीर पकडण्यासाठी निविदा काढण्यात आल्यावरून आश्चर्य व्यक्त करण्यात येत होते. त्यामुळे निविदा कोण भरणार, याबाबत उत्सुकता निर्माण झाली होती. अखेर तिघांकडून निविदा सादर करण्यात आली आहे. जिल्हाधिकारी कार्यालयात उंदीर व डासांचा उपद्रव वाढल्याने निविदा मागवावी लागली आहे. उंदरांकडून महत्त्वाच्या फायली कुरतडणे, याबरोबरच संगणकांच्या वायरी तोडल्या जात असल्याने अनेकवेळा कामात व्यत्यय निर्माण होत आहे. याबरोबरच महत्त्वाची कागदपत्रे उंदरांकडून कुरतडली जात असल्याने भविष्यात याचा धोका लक्षात घेत उंदरांचा बंदोबस्त करण्यासाठी निविदा मागविण्यात आली आहे. तसेच कार्यालयात डासांचा प्रादूर्भावही वाढला आहे. त्यामुळे कर्मचाऱ्यांना डासांमुळे नाहक त्रास सहन करावा लागत आहे. याचा बंदोबस्त करण्यासाठी निविदा मागविण्यात आली होती. त्याप्रमाणे तिघाजणांकडून निविदा सादर करण्यात आली आहे. त्यामुळे कोणाची निविदा मंजूर होणार, हे पहावे लागणार आहे.
प्रादेशिक आयुक्त कार्यालयात प्रयोगाला यश…
प्रादेशिक आयुक्तांच्या कार्यालयातही मोठ्या प्रमाणात उंदीर झाले होते. त्यामुळे तेथेही कागदपत्रे कुरतडली जात होती. याची दखल घेत जिल्हाधिकारी नितेश पाटील प्रादेशिक आयुक्त म्हणून प्रभारी असताना उंदरांचा बंदोबस्त करण्यासाठी त्यांनी असा प्रयोग केला होता. त्याठिकाणी असणारे उंदीर कमी झाले. त्या पार्श्वभूमीवर जिल्हाधिकारी कार्यालयात उंदरांच्या बंदोबस्तासाठी निविदा मागविण्यात आली असल्याचे सांगण्यात येत आहे.
