नगरविकास सचिवांकडून सोनसड्यावर पाहणी

मडगाव : सोनसडा कचराप्रकरणी पुढील सुनावणी आज बुधवारी उच्च न्यायालयात होणार आहे. या पार्श्वभूमीवर नगरविकास खात्याच्या सचिवांनी मंगळवारी भेट देऊन माहिती जाणून घेतली. येथील सध्याच्या स्थितीबद्दल सचिवांनी समाधान व्यक्त केल्याची माहिती नगराध्यक्ष दामोदर शिरोडकर यांनी दिली. या भेटीवेळी सोनसड्यावर मडगाव पालिकेचे मुख्याधिकारी गौरीश शंखवाळकर, पालिका अभियते आणि अधिकारी उपस्थित होते. सध्या मडगाव पालिका क्षेत्रातील सुमारे 30 ते 35 टन ओला कचरा सोनसड्यावरून रोज साळगाव येथील कचरा प्रक्रिया प्रकल्पात पाठविला जात असतो. कचऱ्यात कोणत्याही प्रकारचा सुका कचरा व अन्य साहित्याचे मिश्रण होणार नाही याची कचरा ट्रकमध्ये भरण्याआधी खास दखल घेण्यात येत असते. पालिकेच्या कनिष्ठ अभियंत्यांची सोनसड्यावर रवानगी करून त्यांच्यावर दैनंदिन बाबींवर देखरेख ठेवण्याची जबाबदारी सोपविण्यात आली आहे. पालिकेचा दैनंदिन कचरा मागील पंधरवडाभरापासून साळगाव कचरा प्रक्रिया प्रकल्पात नेण्यात येत असल्याने येथील शेडमध्ये नव्याने कचरा टाकला जात नाही. मात्र आधीच कचऱ्याने भरलेल्या या शेडमधील कचऱ्यावर पालिका कोणती प्रक्रिया करणार तसेच यासंदर्भात न्यायालयाला काय सांगणार याकडे मडगाववासियांचे लक्ष लागून आहे.