केएससीए 16 वर्षाखालील आंतरक्लब क्रिकेट स्पर्धा
बेळगाव : कर्नाटक राज्य क्रिकेट संघटना मान्यता प्राप्त धारवाड विभागीय क्रिकेट संघटना आयोजित केएससीए चषक 16 वर्षाखालील क्रिकेट स्पर्धेच्या बुधवारी खेळविण्यात आलेल्या उपांत्यपूर्व फेरीत बेळगाव स्पोर्ट्स क्लबने क्रिकेट क्लब ऑफ कर्नाटका संघाचा 9 गड्यांनी पराभव करून उपांत्य फेरीत प्रवेश केला आहे. हुबळी स्पोर्ट्स क्लब व टॅलेंट स्पोर्ट्स क्लब यांच्यातील दुसरा उपांत्यपूर्व फेरीचा सामना पावसामुळे अर्धवट राहिला. 4 गडी बाद करणाऱ्या बेळगाव स्पोर्ट्स क्लबच्या सोहम पाटीलला सामनावीर पुरस्कार देण्यात आला.
ऑटोनगर येथील केएससीए क्रिकेट स्टेडियमवर घेण्यात आलेल्या पहिल्या उपांत्यपूर्व सामन्यात क्रिकेट क्लब ऑफ कर्नाटका संघाने प्रथम फलंदाजी करताना 41.4 षटकात सर्व गडी बाद 78 धावा केल्या. त्यात संपतकुमार 2 चौकारासह 12, प्रविण ए. नाबाद 10 धावा केल्या. त्याच्या व्यतिरीक एकही फलंदाज दुहेरी धावसंख्या गाठू शकला नाही. बेळगाव स्पोर्ट्स क्लबतर्फे सोहम पाटीलने 18 धावात 4, सुरेंद्र पाटीलने 9 धावात 3, निल पवार, अर्णव कुंदप यांनी प्रत्येक 1 गडी बाद केला. प्रत्युत्तरादाखल खेळताना बेळगाव स्पोर्ट्स क्लब अ संघाने 13.4 षटकात 1 गडी बाद 81 धावा करून सामना 9 गड्यांनी जिंकला. त्यात संचित सुतारने 3 चौकारासह 25, निल पवारने 2 चौकारासह नाबाद 30, तर आशितोष हिरेमठने 2 चौकारासह नाबाद 18 धावा केल्या. क्रिकेट क्लब ऑफ कर्नाटकातर्फे संपत बी. ने 1 गडी बाद केला. हुबळी येथे खेळविण्यात आलेल्या दुसऱ्या उपांत्यपूर्व फेरीच्या सामन्यात हुबळी स्पोर्ट्स क्लब अ संघाने प्रथम फलंदाजी करताना 48 षटकात 8 गडी बाद 196 धावा केल्या. त्यात मनिष एन. ने 41, विजय बांडीने 35, विकास पाटीलने 33, संकेत शेट्टी व हर्षित आर. एस. यांनी प्रत्येकी 24, तर सुहास एम. ने 13 धावा केल्या. टॅलेंट स्पोर्ट्स क्लब हुबळीने अमृत पाटीलने 28 धावात 4, प्रितम एस. पृथ्वी व यशवंत यांनी प्रत्येकी 1 गडी बाद केला. प्रत्युत्तरादाखल खेळताना 8 षटकात 2 गडी बाद झाल्यानंतर पावसाने हजेरी लावली. मैदान ओलसर झाल्याने सामना थांबविण्यात आला. यावेळी प्रविण शिलदने नाबाद 11 धावा केल्या. हुबळीतर्फे विकास पाटील व हर्षित यांनी प्रत्येकी 1 गडीबाद केला.
