लोककल्प-केएलईतर्फे आरोग्य तपासणी शिबिर

बेळगाव : लोककल्प फौंडेशन आणि केएलई हॉस्पिटल येळ्ळूर यांनी एकत्रितपणे देवाचीहट्टी येथे सामान्य आरोग्य शिबिर आयोजित केले होते. ज्याचे उद्दिष्ट ग्रामीण भागामध्ये आरोग्य सेवा उपलब्ध करून देणे होते. डॉ. ऐश्वर्या यांच्या नेतृत्वाखाली आणि केएलई हॉस्पिटल येळ्ळूर येथील अनुभवी डॉक्टरांच्या समूहाने गावकऱ्यांना वैद्यकीय सेवा दिली. नर्सिंग कर्मचाऱ्यांच्या साहाय्याने आणि जनसंपर्क अधिकारी संतोष यांच्या उपस्थितीमुळे प्रभावी संवाद साधला. लोककल्प फौंडेशनच्या माध्यमातून लोकमान्य मल्टिपर्पज को-ऑप. सोसायटी विविध समाजकार्ये सातत्याने राबवित असते. 32 खेडी दत्तक घेऊन लोकमान्य सोसायटीने सामाजिक बांधिलकी जपली आहे. गरजू नागरिकांना आरोग्य सेवा प्रदान करण्यात आली. शिबिरात उपस्थितांना रक्तदाब व रक्तातील ग्लुकोज पातळी तपासणी तसेच इतर चाचण्या व मोफत वैद्यकीय सल्ला देण्यात आला. लोककल्प फौंडेशनतर्फे मोफत औषध वाटप करण्यात आले आणि आरोग्य तपासणी करण्यात आली. या कार्यक्रमात गावकऱ्यांचा सक्रिय सहभाग होता. शिबिर सुरळीत पार पाडण्यासाठी स्वयंसेवक संतोष कदम, सुहासिनी पेडणेकर आणि प्रितेश पोटेकर उपस्थित होते.