वृत्तसंस्था / भुवनेश्वर (ओदिशा)
येथे झालेल्या 62 व्या आंतरराज्य राष्ट्रीय अॅथलेटिक्स स्पर्धेत तामिळनाडूने सर्वंकश जेतेपद पटकावले. सदर स्पर्धा आगामी आशियाई स्पर्धा आणि आशियाई अॅथलेटिक्स स्पर्धेसाठी पात्रतेची होती.
अलीकडच्या कालावधीत भुवनेश्वरमध्ये आंतरराष्ट्रीय स्तरावरील स्पर्धा यशस्वीपणे जात आहेत. गेल्या आठवड्यात येथे 2023 सालातील इंटरकॉन्टिनेंटल चषक फुटबॉल स्पर्धा यशस्वीपणे पार पडली होती तर आता भुवनेश्वरच्या कलिंगा स्टेडियमवर 62 वी आंतरराज्य राष्ट्रीय अॅथलेटिक्स स्पर्धा समाप्त झाली. पाच दिवस चाललेल्या या स्पर्धेच्या समारोप समारंभाला अदिली सुमारीवाला, विनित कृष्णा, ललित भानोत, अंजू बॉबी जॉर्ज, मधुकांत पाठक, हे मान्यवर उपस्थित होते. या स्पर्धेत पुरुष विभागात गोळाफेकधारक अॅथलेटिक्स तेजिंदरसिंग तूर तर महिला विभागात ज्योती येराजी यांची अनुक्रमे सर्वोत्तम पुरुष आणि महिला अॅथलिट म्हणून निवड करण्यात आली. या स्पर्धेत तामिळनाडूने पुरुष विभागात सांघिक विभागात तर उत्तर प्रदेशने महिला विभागात सांघिक जेतेपद पटकावले. तामिळनाडूने या स्पर्धेत सर्वंकश जेतेपदाचा बहुमान मिळवला.
