वारणानगर / प्रतिनिधी :
कोडोली ता. पन्हाळा येथील यशवंत आयुर्वेदिक महाविद्यालयाच्या आवारातून दुचाकी चोरणाऱ्या दोघांना कोडोली पोलिसांनी अटक करून त्यांच्याकडून चोरीतील तीन दुचाकी हस्तगत केल्या.
भोसलकी, कोडोली येथील सागर बाजीराव पाटील यांची दि. 13 जून रोजी सायकांळी 5 वा. हिरो होंडा कंपनीची दुचाकी चोरीला गेली होती. याचा गुन्हा कोडोली पोलीसात दाखल झाला होता. या दोन आरोपींनी MH10-DR 3735 या गाडीवरील दोन इसमानी या दुचाकीची चोरी केली होती. या संदर्भावरून पोलिसांनी तपास चालू केल्यावर दीपक पांडुरंग वाघमारे या अट्टल चोरटय़ाकडून तीन दुचाकीसह त्याला शुक्रवारी (दि. 16) रोजी ताब्यात घेतले होते. यातील दुसरा आरोपी सोमनाथ रामू सुतार (दोघेही चिकुर्डे ता. वाळवा जि. सांगली) याला शनिवारी अटक केली. त्याचा कोडोली, कराड, इस्लामपूर येथून दुचाकी चोरण्यात सहभाग होता.
कोडोली पोलीस ठाण्याचे सहाय्यक पोलीस निरीक्षक एस. ए. डोईजड, सहा. फौजदार पाटील, पोलीस हेडकॉन्स्टेबल माने यांनी या चोरीचा छडा लावला.
