फिर्यादीस २ लाख रुपयांची नुकसान भरपाई
सांगोला प्रतिनिधी
फिर्यादी हिचे बरोबर लुडो गेमवर हेतुपूर्वक मैत्री करुन खोटया प्रेमाच्या जाळ्यात ओढून जवळीक साधण्यासाठी वारंवार मोबाईलवर व्हीडीओ कॉल करुन अश्लीस चाळे केल्याने व बेकायदेशीरपणे गैरवर्तणूक करण्याची वारंवार मागणी करुन तसेच अश्लील व्हीडीओ तयार करुन सदर अश्लील व्हीडीओ हे सोशल मीडियावर अपलोड करून फिर्यादीची सामाजिक, मानसिक मानहाणी करत फिर्यादीची जाणीवपूर्वक बदनामी केली, म्हणून यातील आरोपी अमनदीप करम सिंग (वय २३) रा. लखना थापा, ता. पटटी जि. तरन तारण ( पंजाब) यांच्याविरोधात सांगोला पोलीस स्टेशन भा.दं.वि. कलम ३५४, ३५४, ३५४ ड, ५०४, तसेच माहिती तंत्रज्ञान कायदा २००० चे कलम ६७ अ प्रमाणे प्रमाणे गु. र. क्र ११२६ / २०२१ अन्वेये गुन्हा दाखल करण्यात आला होता.सदर गुन्हाचा तपास तत्कालीन पोलिस निरिक्षक सुहास जगताप व पो.ना. अभिजित मोहोळकर यांनी पूर्ण करुन आरोपीविरुध्द मे. न्यायालयात दोषारोपपत्र दाखल केले.
सरकारपक्षातर्फे एकूण ८ साक्षीदार तपासण्यात आले. त्यातील फिर्यादी, तपासी अंमलदार व सायबर सेलचे पो. कॉ. काकडे यांची साक्ष महत्वाची ठरली. सरकारपक्षातर्फे ॲड. एस.आर. महाडिक यांनी जोरदार युक्तीवाद करत, सध्या समाजामध्ये शालेय अगर कॉलेज युवतींचा इलेक्ट्रिक माध्यमाद्वारे कशा प्रकारे गैरफायदा घेत त्याने सामाजिक व मानसिक हानी पोहचवून त्यांचे सामाजिक, कौटुंबिक आयुष्य कशा प्रकारे उध्दवस्त केले जाते. या विषयी योग्य बाजू मांडत सदर खटल्यातील महत्वाची बाबही याच अनुषंगाने असल्याचे मत मांडत तसेच भा.दं.वि. व माहिती तंत्रज्ञान कायदयामधील तरतुदींच्या अनुशंगाने आरोपीचे वर्तन हे कायदेशीररित्या कशा प्रकारे चुकीचे व बेकायदेशीर आहे हे अभियोग पक्षाने सिध्द केला आहे.
अभियोगपक्षाचा सदरचा युक्तीवाद ग्राहय धरुन सांगोला येथील २ रे प्रथमवर्ग न्यायदंडाधिकारी श्रीमती के. बी. सोनवणे यांनी सदर गुन्ह्यातील आरोपी अमनदीप करम सिंग यास दोषी धरुन भा.दं. वि. कलम ३५४ मध्ये ३ वर्ष सश्रम कारावास तसेच माहिती तंत्रज्ञान कायदा कलम ६७ मध्ये ३ वर्ष अशी एकूण ३ वर्ष शिक्षा व २५ हजार रुपये दंडाची व दंडाची रक्कम न भरल्यास तीन महिने साधा कारावासाची शिक्षा तसेच फिर्यादीस २ लाख रुपये नुकसान भरपाई देणेची शिक्षा ठोठावली आहे.
सदर प्रकरणात अभियोगपक्षा तर्फे सहा. सरकारी अभियोक्ता एस. आर. महाडिक, व्ही.जी साळुंखे यांनी काम पाहिले तसेच कोर्ट पैरवी अधिकारी म्हणून पो.हे. कॉ. पिसे व पो.कॉ. शिंदे यांनी प्रत्यक्ष लक्ष घालून काम पाहिले.
