गांधीनगरातील ड्रेनेज पाईपलाईन बदलण्याची स्थानिकांची मागणी

बेळगाव : सुभाष गल्ली, पहिला क्रॉस, जुने गांधीनगर येथील ड्रेनेज पाईपलाईन पूर्णपणे खराब झाली असून ती बदलावी, त्याचबरोबर ड्रेनेज चेंबरची स्वच्छता करावी, अशी मागणी जुने गांधीनगर येथील नागरिकांनी महानगरपालिकेकडे केली. सोमवारी आयुक्तांना निवेदन देऊन ही समस्या सोडविण्याची मागणी त्यांच्याकडे करण्यात आली. जुनी ड्रेनेज पाईपलाईन जागोजागी खराब झाली आहे. यामुळे सांडपाणी ओव्हरफ्लो होऊन घरांमध्ये शिरत आहे. ओव्हरफ्लो झालेले सांडपाणी रस्त्यावर साचून रहात असल्यामुळे रोगराई पसरण्याची शक्यता आहे. त्याचबरोबर जुने गांधीनगर परिसरातील ड्रेनेज चेंबरची मागील अनेक दिवसांपासून स्वच्छता करण्यात आलेली नाही. यामुळे ते ब्लॉक झाले असून परिसरात दुगर्धीं पसरली आहे. नवीन पाईपलाईन करून ड्रेनेजची स्वच्छता करावी, अशी मागणी नागरिकांच्यावतीने करण्यात आली. यावेळी माजी नगरसेविका मंगला खटावकर, सुनीता चौगुले, रेखा चौगुले, राजाराम राऊत, मारुती पाटील, अनिता पिंगट, अर्जुन खटावकर, सुनीता जाधव, एन. हणगोजी यासह नागरिक उपस्थित होते.